NEEPCO Chairman & Managing Director (CMD) I.P. Barooah leh Mizoram sorkar aiawhin Vanhela Pachuau, Chief Secretary te chuan nimin khan Hydro Electric Projects 3 tan thawhdun remtihna, Memorandum of Agreements (MoA) an ziak fel. He thu hi nizana Neepco CMD in State Guest House a Press Conference a kohva a sawi a ni. Heng thawhdunna turte hi Chhimtuipui H.E.Project (635 MW), Lungreng H.E.Project (815 MW) leh Mat H.E.Project (76MW) te an ni.

CMD chuan Chhimtuipui leh Lungreng H.E.Projects te hi kum 2004 August thla a Pre-Feasibility report lo siam tawh anih thu sawiin, Mat H.E.Project chu kum 2007 khan Central Water Commission in Detail Project Report alo siam tawh thu a sawi a.Heng Projects thawh turte hi kum khat leh a chanve chhung vel chu field investigations neih nan hman a ni ang CMD chuan a ti a, chumi zawhah chuan techno commercial viability leh tul dangte thawh chhunzawm chhoh zel a ni ang a ti.Tuirial Hydel Project chungchang zawhna ah I.P.Barooah chuan 35% hna thawh zawh tawh, chawlhsan lailawk tak Tuirial H.E.Project hi Mizoram Sorkar chuan a tuipuiin hna chhunzawm leh thuai hi a phur hle a ni tih sawiin, thla thum hnu velah hna chhunzawm leh theih a beisei thu a sawi a, India sorkara Cabinet Committee on Economics Affairs atanga clearance neih hmasak phawt a tul a ni a ti. A senso tur thu ah 85% chu foreign funding a nih tur thu leh abak zawng chu India Sorkar tum tur a ni ang a ti.