North East Region Commonwealth Parliamentary Association (NERCPA) Annual Conference vawi 16-na chu June ni 14-18 chhung khan Imphal ah neih a ni a. Kumin conference thupui chu “North East and Look East Policy” niin, India hmarchhak state hrang hrang Speaker leh Deputy Speaker-te bakah official pawimawh ten an chhim a. He conference hian India hmarchhak state-te chak zawka an hmasawn theih nan leh ram thenawmte nen inlaichinna tha zawk siam nan India Sorkar chuan Act East Policy tan liau liau Ministry, Department emaw Forum hran din tura an beiseina thutlukna chu India hmarchhak state pariat speaker ten an sign a ni. 

He resolution hian India Sorkarin hmarchhak state-te hmasawnna a ngaipawimawh avanga Look East Policy pawh Act East policy tia a thlak thu tarlangin, heng state pariat te hmasawnna daltu hrang hrang – inkalpawhna leh inbiak pawhna lama harsatna awmte, hna lak leh thalai hna hmulo awm chungchangte sukiang tura hmalak a tul thu te tarlan a ni a. South Asia ram te nena inlaichinna leh insumdawn tawnna atan luhka pawimawh tak an nih bakah Tourism, Energy leh Trade & Commerce lamah potential tha tak an neih avang ten hmarchhak state pariat te chuan Act East Policy chu chak zawka kalpui an duh thu resolution ah hian an tarlang a. Hmasawnna chak leh rulkhai tak a awm theih nan Special Category State status, Backward Region Grant Fund (BRGF) leh North East Industrial and Investment Promotion Policy (NEIIPP) tharthawh leh tha an tih thu te an tarlang bawk.