Vawiin khan Election Special Drive chungchang DC Conference Hall, Kolasib-ah  Dr. Arun T., Deputy Commissioner leh District Election Officer ni bawk hovin sawiho a ni. 

He hun ah hian Bawrhsap chuan Power Point hmangin democracy chungchangah zirtirna a pe a. Bawrhsap chuan nakum 2018 a inthlanpui lo awm tur thlirchungin mipuite inzirtirna tha pek a tul a ni a ti a. Democracy ramah chuan vote neih hi mitin tana pawimawh hmasa ber a ni a,  India khua leh tui, kum 18 leh a chunglam te chuan vote thlak thei tura Electoral Roll a inziakluta, ram hruaitu thlang tur hian mawhphurhna kan nei a ni a ti a. He special drive buatsaih tur hi india khua leh tui zingah kum tling tawh si, roll-a la chuang lote bakah  kum tling thar te thunna tur a ni a ti. 

Election Commission of India chuan Special Drive hmangin thalai kum 18 leh 21 inkar te chu Electoral Roll a ziahluh an nih vek theih nan beihpui a thlak dawn a, he beihpui hi thlathar 1st July atanga 31st July, 2017 thleng kalpui tum a ni. He beihpuiah hian kum 18 leh 21 inkar te ngaihpawimawh bik an ni anga,  chutihrualin engemaw avanga Electoral Roll a la lut remchang lo te pawhin he hunah hian ngaihven theih  a ni ang a. Beihpui thlak chhung hian Electoral Roll a luh na Form 6 chu veng leh khaw tina Booth Level Officer (BLO) te hnenah lakchhuah leh thehluh theih a ni ang. 

8th leh 22ndJuly, 2017  ah hian Polling Station area tinah Special Camp buatsaih a ni ang a, heng ni ah te hian BLO te chu application form nen an thu in, ni danga application ti remchang lo te tan he ni ah hian a tih theih dawn a ni. 

He beihpui chhung hian BLO  te'n an bial a in tinah survey neiin, dilna form dahkhah mai theih tur an keng bawk ang. Hei bakah hian Mobile application hmangin dilna te hi thehluh theiha ni bawk ang. 

He beihpui atan hian National Call Centre chu Election Commission of India in mipui ten hriatbelh duh leh harsatna an neih ang ang zawhfiah nan a siam a (0389) 1950 (toll free) hi dial in Special Drive chungchang hriat duh ang ang te pisa kai hun chhungin a zawhfiah theih dawn a ni. 

Political Party te'n he beihpui chhung hian official te leh mipui te lo puibawm turin Polling Station tinah Booth Level Agent an ruatin an tel ve thin dawn a ni.