Vawiin khan Chief Minister Pu Lal Thanhawla chuan Economics & Statistics Department hnuaia District Research Officer Office, Serchhip, office building sak thar a hawng a, office hawnna programme ah hian Finance Minister, Planning & Programme Implementation Department enkawltu Minister ni bawk Pu Lalsawta pawh a tel a ni.

Chief Minister Pu Lal Thanhawla chuan hmasawnna tha nei turin ruahmanna (planning) felfai tak neih a pawimawh a, chumi atan chuan statistics leh thil reng reng chhinchhiah hi thil tul leh hmanraw pawimawh ber a ni a, ruahmanna tha, felfai leh changtlung tak hi statistical data ah a innghat a ni, a ti a. Chutiang a nih avangin vawiina he office pawimawh tak kan hawn hian District mai ni lo Mizoram hmasawnna turah kan tangkaipuiin kan hlawkpui ka ring a ni, a ti a. Kumtin Budget pharha a ruala economics lama ram thanna bu Economic Survey tlangzarh hian statistical data pawimawh zia a hril tih a sawi bawk.

Pisa dawr leh inenkawlna chungchang sawiin Chief Minister chuan sawrkar hnathawk leh pisa te hi dawr nuam kan ni tur a ni a, chumi rualin mipui tana kan hnathawh te hi a langtlangin, kan thil tih a mawh leh mawhphurna a bik takin sum leh pai enkawlna lamah kan la tur a ni a, hetiang zawnga sawrkar kal hi kan duhdan a ni a ti a. Hun vawn dik kawngah pawh hma kan sawn a, heng zawng zawng hi a hlawhtlin zawk nan Sawrkar siamtu leh neitu mipui kan pawimawh a ni, a ti. Sawrkarin eirukna corruption a haw hle tih sawiin eiru te hrem duh lo ah Sawrkar hi sawi a ni thin a. Mahse thubuai in court a thlen hian Sawrkarin thu a nei tawh lo a ni tiin kum 9 chhungin hreh tak chungin sawrkar in mi 1500 chuang chungah eirukna thilah kut a thlak tih sawiin hengte hi sawrkar tha kan duh avangin tih a ngai a ni, a ti.

Intodelhna chungchang sawiin Chief Minister chuan ei leh bar, sum leh paia kan intodelha, hnam ropui leh zahawm kan nih dawn chuan kan hrisel phawt a ngai a, hnam hrisel ni turin kawng hrang hrangah kan infiah a ngaiin kan nun kan uluk a tul a ni a ti a. Hriselna chungchang a sawizau naah a ber kan nihna te hi a chhuanawm lovin a lawmawm lova, hengte hi insiamthat dan kan ngaihtuah tlan a ngai a, chungte chu Ringtu zawn atanga ngaihtuah a tul tih a sawi a. Sualna chi hrang hrang te hi khawvel awm chungin a awm dawn a, heng sualnaah kan tluk luh loh nan Lal Isua neitu leh Ringtu kan nihna te kan hman rim a ngaiin a tul a ni, a ti.

Serchhip District chu ram laili anih avangin kawng hrang hranga duhsakna dawnga an vanneih thu sawiin heng hmasawnna hi neitu rilru pua lo dawngsawnga hmuak thiam  turin District mipuite a chah a. Hemi atan hian an rilru leh ngaituahna te tih zauh leh tih changkan a pawimawh thu a sawi.  

Finance Minister Pu Lalsawta pawhin thusawiin sawrkar programme New Economic Development Programme  tum leh hemi hmanga Mizoram tih hmasawn tum dante a sawi a ni.

DRO Office hawnna programme ah hian Secretary, Planning Dr. C. Vanlalramsanga'n inlawmna thusawiin programme a kaihruai a, Rev. K.Vanlalmuana'n huserh hmangin Director, Economics & Statistics Pu Lalchhuanawma Hrahsel in Office sak chanchin sawiin a hnen atangin Technical report ngaihthlak a ni a. DC, Serchhip Pi Sangchhin Chinzah in lawmthu sawiin hun a khar a ni.

DRO Office, Serchhip hi kum 2013 a hawn niin an Office building thar sak hna hi November 2015 sak tan niin April 2017 khan sak zawh a ni a. Office hi Mizopa chhiarin chawng hniha a sak niin basement sak tel a ni bawk a. Building dung hi feet 82 niin a vang hi feet 30 a ni a, a floor area zau zawng hi square feet 4979 a ni a. A satu hi AIE Construction niin cheng nuai 60 senga sak a ni. A sakna ram hi Soil & Water Conservation Department in an sahthlak a ni.