Vawiin khan Chanmari Recreation hall-ah Ministry of DoNER hnuaia North East Rural Livelihood Programme leh Accentplus tangkawp buatsaih thla 4 awh ‘Domestic Electric Household Wiring’zirchhuakte chu RD Minister Pu R.Lalzirliana’n lawmpuina hun hmapuiin Certificate a hlan.

Khuallian Pu R.Lalzirliana chuan training chhuakte fuihin eng kawngah pawh hlawhtling tur chuan taimak leh teirei peih a ngai a, mahni eizawnnaah tui a pawimawh a, kut tling lova hausak thut tum hi mihring eichhetu a ni, a ti.

He huna tel ve Pi Jushmita Borah, Project Manager, NRM&E, RPMU NERLP, Guwahati chuan Mizo thalite chu Hindi leh English thiamna kawnga nasa zawka tan la turin a fuih a. Pu Reuben Ranglong, District Project Manager, DPMU NERLP, Aizawl chuan NERLP hnuaia Mizoram chhunga an hmalakna hrang hrang leh skill development lama training hrang hrang an kalpui mek thu leh Mizoram sorkar nena thawk hovin hmalak zel an tum thu a sawi bawk.

Training Report petu Accentplus Managing Director Pu Daniel Hauhnar chuan National Skill Development Corporation (NSDC) hnuaia Mizorama Training Provider (Electronic Sector Skill Council of India) hmasa ber an nih thu a tarlang bawk.