Lengteng Bialtu MLA Pu H. Rohluna, School Education leh Industries Minister, chuan Ngopa leh Kawlkulh Centre-a NLUP 3rd leh 4th phase hnuaia a Hmunphiah chin thlangtu, mi 84-te hnenah NLUP tanpuina 3rd Installment, mi pakhat tan 31,780 theuhvin a sem a. Tun tuma NLUP tanpuina, Champhai District Soil & Water Conservation in a sem chhuah zawng zawng hi avaiin Rs. 26,69,520/- lai a tling a ni.

Nimin July ni 27, 2016 khan Ngopa Zawlbukah NLUP 3rd leh 4th Phase-ah hian Ngopa Centre hnuaiah hmunphiah chin thlangtu, mi 44-te hnenah hian tanpuina 3rd Installment, Rs. 31,780/- theuhva sem niin Bialtu MLA Pu H. Rohluna, School Education Minister, chuan khuallian niin a hmanpui a. Khuallian Pu H. Rohluna chuan mipuite dawmkanna tura sawrkar hmalakna hrang hrangte a tarlang a. NLUP tanpuina dawngtute chu an dawn chhan ang ngeia tihlawhtling tura fuihin, beisei anga la hlawhtlinglo tan pawh hun a la awm a, hlawhtlinna chu nangmahniah a innghat a ni, a ti bawk. NLUP hnuaia tan la thalo tan sawrkar kalphung thar, NEDP ah beisei tur a awmloh tur thu sawiin, NEDP chu tangte tanpuina tur chauha ruahman a ni a ti a. NEDP hnuaia puih tlak ni tura tanla theuh turin beneficiary kalkhawmte a chah bawk. Ngopa a NLUP sem inkhawm hi Pu Lalrinzama, District Soil & Water Conservation Officer-in kaihhruaiin Ngopa RO-in lawmthu sawiin a khar a ni.

Vawiin, July ni 28, 2016 khan Kawlkulh Centenary Hall-ah Kawlkulha Centre-a NLUP 3rd leh 4th Phase hnuaia hmunphiah chin thlangtu mi 40 hnenah 3rd Installment vek sem niin Lengteng Bialtu MLA Pu H. Rohluna, Industries Minister ni bawk chuan khuallian niin a hmanpui a. Khuallian chuan hmunphiah chingtute chu sawrkar tanpuina an dawnte hlawhtlinpui ngei tura fuihin, sawrkar chuan a ruahman angin NLUP tanpuina mipuite hnenah a sem tawh a, a hlawhtlinna erawhchu NLUP dawngtute thawhrimnaah a innghat a ni, a ti a. NLUP hnuaia theihtawpa thawk leh hlawhtlin tuma tan late chu NEDP hmangin sawrkarin a la chhawmdawla, a la tuamhlawm zel tur thu leh NEDP chu kalphung pangngaia hmasawnna hna thawh remlo tam takah pawh hman tangkai theih a nih tur thu sawi bawk. NLUP sem inkhawm hi District Soil & Water Conservation Officer, Pu Lalrinzama’n kaihhruaiin Kawlkulh Norht VCP in lawmthu sawiin a khar a ni.

Champhai District Soil & Water Conservation Officer Report-in a tarlan danin Champhai District chhungah hian NLUP hnuaiah Hmunphiah chin thlangtu 653 awmin Lengteng Constituency huam chhung bikah 408 an awm a. Kum 2015-16 chhung khan Champhai District puma hmunphiah quintal 1125.50 thar chhuah niin hemi atanga hian cheng nuai sawmnga leh pali chuang lakluh a ni bawk. Tun tuma NLUP tanpuina semna, Ngopa leh Kawlkulh Centre bik hian 2015-16 chhung vek khan hmunphiah quintal 467.76 thar chhuah niin hemi atang hian chen nuai sawmhnih leh pahnih chuang lakluh a ni bawk.