RD Department hnuaia NERLP State Co-Ordinator hna lak chungchangah mithenkhat ten thil hriat chian tawk loh avangin chanchinbuah-te hna lak dan a diklo ti a chhuah a ni a, hemi chungchang thil awmzia dik tak chu RD Department chuan a hnuai ami ang hian a sawifiah.

NERLP hi World Bank Funded Project niin IFAD (International Fund for Agricultural Development) bul tumin Ministry of DoNER in NEC kaltlangin State 4 (pali) ah te kalpui mek a ni a. Mizoram ah chuan Aizawl leh Lunglei District ah hmalak phawt tur a ni a. Hemi project enkawl tur hian State Co-ordinator leh District Project Manager te lak tur a ni a.

State Co-Ordinator chu Sorkar hnuaiah ni lovin NELPS (North East Livelihood Promotion Society) hnuai a thawk tur a ni a, hlawh leh mamawh tul dang zawng zawng te pawh he Society hian a tum vek tur a ni a. NEC chuan hnathawk tur te hi interview hmangin a thlang mai thin a, District Project Manager pawh ni 12.07.2011 khan Secretary, NEC Chairman-na hnuaiah Personal Interview hmangin Aizawl-ah lak fel a ni tawh nghe nghe a ni.

NEC lam atanga Co-Ordinator la thuai tura nawrna a awm reng bawk si avangin State dang ten State Co-Ordinator hi engtinnge an lak tih zawh kual a ni a. State hrang hrang ten an lak dan a inang lo hlawm a. Sikkim sorkar chuan sorkar hnathawk chawl tawh (Retired Govt servant) interview leh exam awm lovin an la a, chutih laiin State thenkhat chuan NELPS, Guwahati hnenah hemi hna atana tha tura an ngaihte hming leh nihna kimchang thawnin an ni lo thlan fel turah an dah bawk a.

Hetianga State hrang hrang ten State Co-ordinator an lak dan te a in an loh avang leh NEC in Mizoram sorkar, Rural Development Department kuta a dah avangin Department chuan he hna diltu hi an tam tham deuh avangin personal interview neih hmain hna diltute hi thlitfim phawt nise. He thlitfim (screening) nan hian General English leh General Knowledge ah ziakin exam neih nise chuta za a sawmnga (50%) hmu chin te chu personal interview turin koh nise. Amaherawhchu he personal interview ah hian thlitfim nana exam (screening test) buatsaih a, an mark hmuh hian engmah kori tu lo se (bears no weightage) tiin thutlukna a siam a ni. He thutlukna Department in a siam lai hian tunge screening exam hi paltlang ang tih hriat a ni lo.

MPSC pawhin hetiang anga Screening Test hi Taxation Inspector hna lak ah te pawh an lo hmang tawh a ni. Hemi chungchangah NERLP Regional Office, Guwahati pawh biakrawn a ni a. An ni hian State Co-ordinator la tura Mizoramah an rawn kal theih loh tur thu leh Rural Development Department in Recruitment a kalpui dan tur an ruahman chu tha tawk ah an ngaih thu leh chumi ang a hma lo la turin thu an rawn bawk a. Tin, NERLP hnuaia State Coordinator hi Sorkar leh Department hnuaia thawk tur ni lovin Society hnuai a thawk tur anih avang hian he hna lak dan chungchangah pawh State Sorkar dan emaw MPSC Guideline emaw hmang kher tur hian Society chu a phuar lem lo a ni.

Department thutlukna ang hian dt. 24.09.2011 khan Screening Test chu neih a ni ta a. Chutah chuan 50% hmu chin chu mi 30 an ni a. Heng mi 30 te hi personal interview nei turin koh an ni ta a ni. Heng mi 30 zing atang hian Selection Committee chuan interview-a ti tha ber an thlangchhuak ta a ni. Interview-a ti tha te marks hmuh dan chu Mary Jones Lallawmawmi (80%), Lalkhawngaiha (75%) leh Robert L. Hauhnar (70%) te a ni.

Candidate ten Screening Test an paltlang tawh hnu chuan Screening Test a an mark hmuh hian awmzia a nei tawh lova, interview a an mark nen hian belhkhawm tur pawh a ni lo. Written exam hi Screening Test ani tih candidates-te Calling Letter-ah chiang taka tarlan a ni a. Sawi tak angin, Screening Test chu Personal Interview nei thei tur chin thlitfimna mai a ni. Hnathawk tu tur thlang tu zawk chu Selection Committee a ni a, interview-a ti tha ber an thlang ta a ni.

Hetiang hi thil awmdan a nih avangin, NERLP State Coordinator hna lak chungchangah hian thil diklo leh dan bawhchhiatna engmah a awm lo a ni.