Vawiin khan Environment &Forests Minister Pu H.Rohluna chuan Environment &Forests Field Staff Association General Conference vawi 12-na chu Central YMA Hall, Tuikhuahtlangah a hmanpui.

Pu H.Rohluna chuan mau hi Mizoram rohlu, chhungkaw tam tak tana eizawnna tha tak pe theitu a nih avangin State pawna thawnchhuah kawngah sorkar chuan mumal taka khuahkhirh a duh a. Mahal System leh Permit System a kalpui thin te chu mausattu hnam dang mi ten dimdawina nei hauh lova nasa taka mau an tih chereu thin avangin tihtawp a ni a. A hlutna belhchhah tura sawngbawlsa a thawnchhuah chu a samkhaiin a hlawk zawk a, a puma thawnchhuah tawh loh chu tha zawk a an hriat thu a sawi a ni. Minister chuan Field Staff te chu a tak taka thawktu, Forests Department hmel an ni tiin ramngaw leh nungcha humhalh kawngah te, kangmei laka ram venhim kawngah te, an mawhphurhna zawn theuhah thahnemngai leh rinawm taka thawk turin a chah a ni.

Principal Chief Conservator of Forests, Pu SS Garbyal pawhin thu sawiin Field Staff te chu a tak taka hnathawktu leh mipui nena inhnimhnai ber an nih avangin thahnemngai taka thawk turin a chah a. An Service dinhmun pawh siam tha turin theihtawpa hma a lak thu a hrilh.

MEFFSA Conference-ah hian hruaitu thar thlanna an nei nghal a, President atan PC Sainghinga, Vice President-ah Hauthawmvunga, General Secretary-ah Lalthantluanga, Asst. Secretary-ah Vanlalpeka, Treasurer-ah Zakamlova leh Finance Secretary-ah H.Lalropuia te an thlang. An thurel pawimawh hrang hrang te chu Deputy Ranger Post hi tihbo ni se, Deputy Ranger hi Forest Ranger-ah upgrade ni se tih te; E&F Dept. hnuaia NLUP hi a hlawhtlin ngei theih nan chak taka hmalak ni se tih te; recruitment rules siam that ni se tih te leh Duty laia thi leh hliam tuar te sorkarin zangna dawmna pe tura ngenna te bakah an Association chhung thu pawimawh hrang hrang te an ni.