2426/2026-2027

New Delhi-a cham mek Agriculture Minister Pu PC Vanlalruata’n Mizoram tan central scheme aṭangin sum sanction cheng vaibelchhe 75.79 a dawng

Agriculture & Farmers' Welfare Minister Pu PC Vanlalruata chuan nimin September ni 29 khan New Delhi-a National Conference on Rabi Campaign neihah a tel a. Union Agriculture Minister Pu Shivraj Singh Chouhan chuan Pu PC Vanlalruata hnenah central scheme aṭanga sum sanction cheng vaibelchhe 75.79 a hlan.

Conference hi sawrkar laipui Ministry of Agriculture & Farmers' Welfare buatsaih niin, Rabi crops (thlasik thlai) chungchanga hmalakna kal mek te leh hmachhawp te thlir hona programme a ni a. Union Minister chuan A&FW Minister Pu PC Vanlalruata hnenah hian RKVY (Rashtriya Krishi Vikas Yojana) scheme pawisa cheng vaibelchhe 27.84 leh KY (Krishonnati Yojana) scheme pawisa cheng vaibelchhe 47.95 release order a hlan a, a vai belkhawmin cheng vaibelchhe 75.79 a tling a ni.

Conference-ah hian Minister Pu PC Vanlalruata chuan thu sawiin, Mizorama agriculture tihhmasawn nan inkalpawhna kawng sial a pawimawh thu a sawi a. Kan farmer te chuan an chenna khua aṭanga hla tak takah ram an neih ṭhin avangin, an thlai thar te awlsam zawka phur chhuahna tur agriculture link road mumal tak an mamawh a; oil palm-ah bik phei chuan oil palm thar chhuah hun hi fur ruahtui tam lai a ni ṭhin a, kawng chhiat zual lai a nih ṭhin avangin oil palm chingtuten harsatna tam tak an tawk ṭhin a ni, a ti.

Farm connectivity ṭha zawk a awm theih nan central sawrkar chu PM RKVY scheme hnuaiah link road siamna tur telh theih ni se tiin Minister chuan a ngen a; monorail te pawh enchhin mek a nih thu leh, kuthnathawktute tan an thlai thar phurchhuah nan a ṭangkai hle tih a sawi. 

Minister Pu PC Vanlalruata chuan SMAM (Sub-Mission on Agriculture Mechanisation) chungchang sawiin, online chauha dilna thehlut tura ruahmanna awm chu Mizoram tan buaithlakna tam tak a awm tih a sawi a. Kuthnathawk, lo neia ei zawng thingtlang mite tan internet kaltlanga dilna thehluh a harsa a, offline-a SMAM scheme hi kalpui leh theih ni se, tiin a ngen bawk.

Pu PC Vanlalruata chuan agriculture kaihhnawih scheme chu phaizawl atana duan a nih tlangpui thu leh Mizoram chu tlangram a nih avangin scheme kenkawhna kawngah harsatna a awm ṭhin a; chuvangin, scheme guidelines hnuaiah Mizoram ang thoa tlangram state dangte tan ruahmanna hrang awm thei se a duh thu a sawi. Heng bakah hian, fertilizer -- DAP leh MOP te hi Mizoram lo thleng turin motor-in thui tak phurh a ngai thin a. Awlsam zawka rawn phurh thlen a nih theih nan rel (train) hmanga thawn ve theih ni se tiin Union Minister ṭanpuina a dil bawk a ni.

He Conference-ah hian India ram state hrang hrang aṭangin Agriculture Minister te an kalkhawm a. Mizoram Agriculture & Farmers' Welfare Department aṭangin Pi Ramdinliani IAS, Secretary; Pi R. Lalramhluni, Joint Director; Pu C. Malsawmkima, Joint Director; Pu Simon Rosangliana, Deputy Director leh Pu Andy Lalfakzuala Varte, Under Secretary te pawh an tel a ni.