2132/2026-2027

New Delhi, the 8th of September, 2026: Vawiin dar 12:00 Noon khan Indian Olympic Association special general body meeting leh Asian Games-a India infiammite tirh chhuahna hun chu News Delhi-a The Ashok Hotel-ah neih a ni a, Mizoram aiawhin Sports Minister Pu Lalnghinglova Hmar, Mizoram Olympic Association (MOA) President ni bawk leh MOA Secretary General Pu V Lalzawmliana te an tel.

He hunah hian India ram sports administrator hrang hrangte leh infiammi, coach leh support staff te an kal khawm a. Sports Minister Pu Lalnghinglova Hmar chuan Boxing Federation of India President Ajay Singh nen Mizoram boxing hruaina kawnga harsatna awm mek chinfel dan an sawi dun a; Cycling Federation of India hotute nen an hnuaia Mizoram Cycling Association-te inziahluh theih dan an sawiho bawk. Hockey India President Dilip Tirkey nen Mizorama hockey hmasawnna an sawi a; All India Football Federation President Kalyan Chaubey nen football thil pawimawhte an sawi bakah Sports Ministry hotu liante nen inkawmin hun tak kan hmang a ni.

Union Sports Minister Dr. Mansukh Mandaviya chuan Asian Games 2026-a India aiawhtu turte tir chhuakin, India ram tihmingtha zual turin an zavaiin a ring tawk tih a sawi a. “He ramah hian talent a awm a, nitin, kumtin hmalam kan pan zel. Kan khingpuite hi hmasawn tura kan rahbi an ni a, chu rahbi chu lawn zelin ‘achievement’ ah kan chantir a ngai a ni.” a ti.

Indian Olympic Association President Pi PT Usha pawhin thu sawiin, “Asia khawmualpuia a tha ber berte nen in ineltawk tih hre reng ula, zam hauh suh ang che u. In bultanna leh vawiina in thlen chin ngaihtuah ula, nuam ti tak leh mahni inringtawk takin, ram tan theihtawp chhuah ang che u.” tiin infiammite a fuih a ni.

Asian Games hi September 19 aṭangin Nagoya, Japan-ah neih tur a ni a, Mizoram aṭangin hockey player pahnih Lalremsiami Hmar leh Lalthantluangi-te an tel ve dawn a ni.