Indira Gandhi National Centre for the Arts (IGNCA), New Delhi leh hmarchhak state Art & Culture department te buatsaih ni 10-18 January, 2009 chhung awh tur ‘Spirit of the Northeast’ chu IGNCA hmunpui Janpath, New Delhi-ah neih mek a ni a. Nimin khan ‘Mizoram State Day’ hman a ni a, Mizoram atanga cultural troupe member 86 kal te chuan Mizo hnam lam, zai, infiam, ei siam, fashion show leh kutthemthiam thil hrang hrang te mipui hmuhah an entir a ni. Nimin tlai vek khan ‘Mizoram Nite’ hman niin Art & Culture Minister Pu P.C.Zoram Sangliana chu Khuallian a ni a, he hunah hian Lok Sabha MP Pu Vanlalzawma pawh a tel ve a ni.
 
 

 

Khuallian Pu P.C. Zoram Sangliana chuan India hmarchhak state ten an culture hausa tak phochhuahna hun remchang IGNCA-in a buatsaih chu a lawmawm hle a ni, a ti a. India ang ram zau leh ropui, hnam leh sakhua chi hrang hrang awmkhawmna ramah inpumkhatna tha tak neih tur chuan state te inkarah chanchin inhrilhhriat tam te, inhriatthiamna leh dawhtheihna kan neih a ngai a. Chumi atan chuan remna leh muanna a pawimawh hmasa ber a ni, a ti bawk. Mizoram chanchin tarlangin kum 1966-a buaina a chhuahna chhan pakhat chu hnamzia leh hnam phung inhriatpawh tawk loh vang a ni a. Amaherawhchu Chief Minister Pu Lal Thanhawla’n a Lalthutthleng a ken avangin Mizoramah remna a lo thleng lehin Peace Accord hlawhtling ber chu ziah a ni ta nghe nghe a. Mizo mipuiten remna leh muanna hlutna an hriatchian tawh avangin Pu Lal Thanhawla chu a tum 4-na atan Chief Minister-ah an thlang leh ta a, Mizoram chu state ralmuang a nih chho zel avangin hmasawnna hrang hrang chak takin a kal bakah Mizo culture pawh humhalh zel a ni thei a ni, Minister chuan a ti.

‘Spirit of the Northeast’ Kut-ah hian hmarchhak state 7 leh Sikkim te an tel kim vek a. He programme-in a tum ber chu hmarchhak culture hausa tak phochhuah te, thuziak leh lem dah thata hnam thil humhalh te, culture hmanga ram pumin inunauna leh inhriatthiamna rilru a put zel theih nan te a ni.

 

 

Attachment

  • Loading attachment...