Vawiin khan Govt Champhai College Multipurpose Hall-ah NEDP  hnuaia Enterprenuership summit neih tur leh  business plan contest chungchang inzirtirna Champhaiah neih a ni. He hun hman hi Pu Remlalliana Hnamte, SDC, DC Office Champhai chuan a kaihhruai a, resource person Pu Lalhruaitluanga (EDS Master Trainer) leh Anna Zorinmawii, IIMCIP Local Team ten zitirna an pe a ni. Pu Lalhruaitluanga chuan Enterprenuership Development Scheme sawihfiahin he Scheme kalpui tur hian Mizoram State Enterprenuership Development & Monitoring Comittee din a ni a, chumi hnuaiah chuan hmalatu tur peng hrang hrang siam leh a ni, tiin, kum 2017-18 atan EDS-ah hian cheng nuai 500 dah a ni a, he sum hmang hian enterprenuership tihhmasawnna leh inzirtirna chu Mizoram hmun hrang hrangah neih a ni, a ti. 

Pu Lalhruaitluanga chuan Enterprenuership-ah thalaite tan zau taka kawng a inhawn thu sawiin, zirlaite hian kan lehkha kan zir chhuah hnuah hna kan inchuh dawn a, sorkar hna kan indaih tawh lova, enterprenuership lamah kawng tam tak a awm a, mi huaisen tan chuan hlawhtlinna tur huntha a inhawng reng a ni, tiin, enterprenuership lama ke pen turte chu sorkarin a puih theih dan hrang hrangte a tarlang a. Mizorama a vawikhatna atan enterprenuership summit chu October thlaa a buatsaih tur leh, he summit hian sumdawnna lama hmasawnna tur kawng hrang hrang inkawhhmuhna te tarlangin, helama tuite chu tel turin a sawm a ni. Hei bakah hian Business plan contest, sumdawnna atana ruahmanna kawnga intihsiakna, www.mizoramkailawn.orgwebsite kaltlanga tel theih chungchang te, helama tuite hriat tur tul hrang hrangte a tarlang tel bawk a ni. 

Entrepreneurship project hi August ni 31, 2017 thleng thehluh theih a ni a; heng project lutte zinga tha thlanna result chu September ni 25, 2017-ah puan a ni ang a, heta tlingte tan Group Camp leh Training buatsaih a ni ang. A chhawng hnihna – Entrepreneurship Summit – hi October ni 10, 2017 ah neih a ni ang a, hetah hian B-Plan Contest Final Result puan a ni bawk ang. 

Anna Zorinmawii chuan website thar, Mizoram Kailawn chungchang sawifiahna a neih bakah EDS-a Mizoram sorkar leh IIMCIP te hmalakna tur hrang hrangte, hlen chhuah an tumte a tarlang ve bawk a. Zawhna leh chhanna hun hman nghal a ni. Vawiina e-summit leh business plan contest hi Mizoram sorkar leh IIMCIP te buatsaih niin District tinah awareness campaign leh Outreach Programme hi neih tura duan a ni.