Vawiin  khan New Secretariat Complex (NSC) Aizawl kum 10 tlin lawmna (10^th Anniversary Celebration) veng pum huapin Residential Buildings chung sen tualzawl ah neih a ni.

He hun hi New Secretariat Complex Welfare Committee huaihawta buatsaih niin Pu H. Darzika MCS (Rtd.) Secretary, State Election Commission leh NSC Welfare Committee lo ni tawh thin chuan khuallian niin a hmanpui a. Khuallian hian Souvenir Magazine ‘Kiltheihrawk’ a tlangzarh nghal a ni.

He hun hi Dr. C. Vanlalramsanga IES, Secretary to the Govt. of Mizoram, UD & PA, Planning & Prog. Implementation Department pawhin hmanpuiin fuihna thu tha tak a sawi a. Pu P.C. Lallianthanga, Chairman, 10^th Anniversity Celebration Committee kaihhruai NSC kum 10 tlin lawmna ah hian Pu L. Biakthanga, Chairman, NSC Welfare Committee chuan lawmna thu (welcome speech) sawiin, Pu R. Lalhmachhuana, Asst. Secretary, NSC Welfare Committee leh Pu H. Lalhmingthanga, Secretary, 10^th Anniversary Committee hnen atangin report nghaihnawm tak ngaihthlak a ni bawk. Zaipawl, Group zai leh mimal zai mawi tak tak bakah lam thiamten mipui kalkhawmte an chawk hlim a. Pu David L. Khiangte, Vice Chairman, NSC Welfare Committee in lawmthu sawiin hun a khar a, tlaiah Anniversary ruai hlim takin an kil ho bawk a ni.

New Secretariat Complex, Aizawl luah lut hmasatute chuan kum 2005 June thla khan an luah lut tan a. An luah luh atang hian kumin 2015 hi a kum sawmna (10^th Anniversary) a lo ni ta a. Veng chanchin record felfai tak siamna remchang nia hriain NSC Welfare Committee chuan hriatreng tlaka lawm thain a hria a. Hlawhtling takin lawm a lo ni ta a ni.

Tun dinhmunah New Secretariat Complex ah hian chhungkua 221 awmin mihring 1050 vel an cheng mek a. Inenkawlna mumal tak a awm theih nan NSC Welfare Committee dinin veng chhung himna leh hmasawnna atan theihtawp an chhuah thin a ni. New Secretariat Complex-a chengte hian nungcha leh thing leh mau venhim kawngah hma an la nasa hle a. Tunah hian Aizawl khawpui hmun danga awm lo, sava chi hrang hrang 80 vel lai a awm a, chung zinga sava lar tak Kiltheihrawk hming chawiin an Souvenir Magazine hming pawh hi an phuah hial a ni.