Vawiin khan Serchhip District Bawrhsap Dr.Lalrozama hovin khawtlang hruaitu rual ten Serchhip a hmasawnna hnathawh, hun rei tak atanga zawh hleih theih lohva awm te a hmunah kalin an enfiah a, hmalak zel dan tur te an sawiho.

A hmasa berin Tourism Department hnuaia sak,  Khawtetlanga mi Tourist Lodge an en a, Tourist Lodge hi kum 2004 vel atanga sak tan tawh, vawiin thlenga sak zawh lohva la awm a ni a, tunah hian hawn mai theiha peihfel thawkhat ni tawhin Tui Connection erawh a la awm lova, hei hi an la hawn loh chhan ber nia hriat a ni a, Department lam atanga hawn thuai erawh an tum nia hriat a niin a chhung Furniture tur pawh order mek a ni a, reilote ah hawn a nih beisei a ni. Hetihrual hian hawn hma a thawm that hlek hlek tur erawh a la awm nual thung.

Hemi hnu hian Serchhip Field No. 1 a Auditorium sak mek an tlawh leh a, Auditorium sak hna, NBCC hnuaia Contract a thawktu Guwahati a inkhuar Agni Shanti Company General Manager Kunal-a leh a thawhpui ten lo dawngsawngin an hnathawhdan tlangpui an lo sawi a, Auditorium chu nakum 2016 January thla ralhma a sak peih hman an inbeisei thu a sawi. Serchhip a Auditorum sak hna hi kum 2010 October atanga thawhtan tawh a ni a, NBCC hnuaiah Sub-Contract in BGM Company in an thawk a, kum 2 chhunga sak zawh hman tura ruahman ni mahse kum 4 chhung pawhin an sa zo hleithei si lova, chuvang chuan nikum August thla khan NBCC hian an Contract hi titawp(terminate) in Guwahati a inkhuar Agni Shanti Company in nikum November thla atang khan an sa chhunzawm ta a ni. Mi 1000 leng tura ruahman a niin a chhungah hian Diesel hmang Generator pawh 125KW zet bun a ni bawk. A chung hi ruahsur changin a la far nasa hle a, thawm leh fe la ngai tura ngaih a ni.

Serchhip District Bawrhsap ho hian Serchhip Hmar Veng Complex Field a Football Stadium sak hna thawh mek pawh an tlawh nghal a, hei pawh hi Auditorium nen NBCC hnuaiah BGM Company in an sa a, kum 2 chhunga sak zawh tura ruahman kha kum 4 hnu ah pawh an la sa zo thei si lova, nikum November thla bawk atang khan Agni Shanti Company ten an sa chhunzawm veleh ta a, tunah hian a Structure an zo tep a, nakum thal chhung hi chuan sak zawh hman an tum niin an insawi.

Serchhip a hmasawnna hnathawh hrang hrang tlawhkualna ah hian Serchhip District Bawrhsap Dr.Lalrozama IAS hi SP Pu VL Ringdika MPS, Pu L.Rinliana SDO(Sadar) bakah Sub-Hqrs. YMA Serchhip hruaitute leh MJA Serchhip Dist. hruaituten an tawiawm a ni.