Vawiin chawhnu ah khan ni 4 chhung cham tura Mizoram rawn tlawhtu Ambassador Ashok Sajjanhar, Secretary, National Foundation for Communal Harmony(NFCH) chuan Mizoram Governor Dr. Aziz Qureshi chu a chenna, Raj Bhavan ah a kawm.

Ambassador Ashok Sajjanhar hian Governor hnenah Mizoram University(MZU) hotute sawmna in college zirtirtute hnenah zirtirna pe tura Mizoram rawn tlawh a nih thu a sawi a. Mizoram chhunga sakhaw hrang hrang betute inmil taka an khawsa thei chu lawmawm a tih thu leh entawn tlak a tih thu a sawi a ni. India sawrkar chuan communal harmony leh a pawimawhna hi zirtirtute hnen atangin zirlai ten dawng chhawng zel tura a duhthu a tarlang bawk. Governor Dr. Aziz Qureshi chuan Mizo thalaite zirtirna pe tura NFCH hotupa a lo kal chu thil lawmawm tak a nih thu sawiin Mizo thalai te’n harsatna an tawh thenkhat te a lo hrilh a. Thalaite’n kawngdik an zawh theih nana zirtirna pe chhunzawm zel tura a duhsak thu NFCH Secretary hi hrilh in tun hnuah pawh Mizoram rawn tlawh zel thin turin a sawm a ni.

Ambassador Ashok Sajjanhar hi khawvel ram tam takah India sawrkar tan palai hna thawk tawh in India leh ram lian tak tak inkarah thuthlung pawimawh tak tak ziah a lo nih theih nana sulsutu pawimawh tak a lo ni tawh a ni. MZU hotute sawmna ang in vawiin khan UGC-Academic Staff College, MZU, Tanhril ah zirtirna pe in naktuk pawh hian zirtirna a pe leh dawn a ni.