Nimin khan Hortoki khua Damdiai Leilet-a SRI Buh chingtu mi 15 te hnenah Pu Lalthansiama, DAO, Kolasib chuan an buh chin tanpuina Rs 7500/- theuh National Food Security Mission (NSFM) atangin a pe.
Farmers Field Day hmanga heng pawisate hi semin Pu Lalthansiama chuan kumin ah ruahtui a tlak tlai avangin SRI buh chingtu ten harsatna an tawk nasa hle a, mahse mithiam te rawtna leh kaihhruaina anga an Buh te an enkawl avangin hlawk takin an thar tho a ni a ti. DAO chuan Kolasib thlang lamah chuan Leilet neituten an Leilet chu hnamdang an enkawl tir a, hnamdang te hian sawrkar duhdan leh kaihhruaina an hrechiang tawk lo thin a, mahni ram mahni ngeiin enkawl hi a thlanawm ber , a tha ber bawk a ti.
Leilet-a thlai chin hi a hlawk bik avangin kumin ah Land Development Project siam leh a ni a, he Project ah hian Leilet hmun tur nei tha, Leilet siam duh te chu sawrkar in Leilet a laih sak ang a; chutah chuan Thlai an ching dawn a. He Project hi kum thar ah chuan kalpui leh theih beisei a ni a ti bawk.
Kolasib Dist chhungah hian Leilet buh chin dan pahnih in Buh an ching a. Improved Package (Leilet Buh chin dan pangngai ) hmangin mi 242 in Hectares 200 a zau-ah Buh an ching a. Leileta SRI Buh chin dan hmangtu mi 65 ten Hectares 80 a zau-ah Buh an ching a ni.
NFSM hian tum bik a nei a. India ram mipui lo pung zelah Buh leh Thlai chinna tur a zim tial tial avang leh kan ei leh in a hautak zel avangin hmun zau tak ngai lo leh thar rang zawk thlai kan neih theih nan Sawrkar laipui chuan kalphung a siam a ni.
