Vawiin khan Agriculture Committee Room-ah ‘Sustainable Agriculture through Expansion, Enhancement and Modeling Project under National Adaptation Fund on Climate Change’ tih thupui hmangin Workshop neih a ni.

Workshop kaihruaitu Dr. C. Lalzarliana, Director of Agriculture (Crop Husbandry) chuan Agriculture-a hmasawnna hrang hrang awm theiah te Department-in tan a lak mek thu leh ram leilung, sik leh sa mila hmalak zel dan tur pawh her rem thiam a pawimawh thu a sawi.

Pu Tsewang Gyaltson, IFS, Nodal Officer, Environment & Forest Department chuan Project kalphung chipchiar taka Power Point-a entirin ram leilung vawnhim a, tharchhuah tam thei ang ber nei thei tura sawngbawl leh buatsaih chu a tum bulpui berte zinga mi a ni, a ti.

Pu J. Suresh, Deputy General Manager, NABARD pawhin thu sawiin sik leh sa inher danglam zelah eizawnna avanga tuartu tam berte chu kuthnathawktute an ni, a ti a. NABARD hian Scheme leh Project hrang hrangah a theih dan danin kuthnathawktute a pui thin a, Agriculture Department pawh he Scheme enkawlnaah theihtawp a chhuahpui zel tur thu a sawi.

Pu Lalbiakzuala, Under Secretary, Agriculture Department pawhin he hun hi hmanpuiin khawvel sik leh sa lo danglam chho zelin a nghawng berte zinga mi chu Agriculture hi a ni a ti a. Hetiang dinhmuna ding hi kan nih avangin loneih leh a kaihhnawih thil reng rengah thiamna thar leh dik ber berte kan hman tangkai a ngai a ni a ti bawk.

Workshop hi chawhma leh chawhnu huna then niin zirtirna hi Pu Pradip Chhetri, Agriculture Extension Officer (IT), Directorate of Agriculture leh NABARD aiawhten an pe a ni.

Workshop-ah hian Implementing District 4 – Aizawl, Serchhip, Kolasib leh Mamit atangin District Agriculture Officer leh Officer dang te bakah Directorate of Agriculture (Crop Husbandry) atangin Officer engemaw zat an tel a, sawihona hun hman a nih bakah pawimawh zual inhrilhhriatna hun atan hman a ni bawk.

Dr. H. Saithantluanga, Joint Director of Agriculture (Planning & Monitoring), Co-Chairman ni bawk chuan lawmthu sawiin Workshop hi tihtawp a ni.