Vawiin chawhma dar 11 khan June 24,2016 (zirtawp) a Mock Drill neih dan tur ngaihtuahin I&PR Conference Hall,CHANEM building-ah Champhai District hotute an thukhawm a, Mock Drill neih dan tur leh chanvo neitu turte ruat fel a ni.

Meeting hi Addl. DC, District Diseaster Management Committee Co-Chairman ni bawk, Pu C. Lalzarliana'n a kaihruaia, Pu Victor Lalawmpuia, ASO Champhai DC Office chuan Mock Drill atana inbuatsaihna report pe in Pu Lalngilneia Colney, DSYO chuan nikum lama Mock Drill lo hman tawh dan report a pe bawk.

Meeting chuan Mock Drill hi District headquarter, Champhai ah chuan hmun hnih a neih tur in a rel a, zinglam dar 11 ah CHANEM-ah hman a ni anga chawhnu dar 1 ah Circuit House-ah hman leh a ni ang. Champhai District a RD block pathum Khawzawl,Ngopa leh Khawbung ah te pawh Mock Drill hi neih tur a ruahman a ni.

Zirtawpni a Mock Drill neih tur atan hian chanvo hrang hrangte insem nghal in Responsible Officer-ah DLAO Pi Lalmuanpuii, MCS; Safety Commander-ah Treasury Officer Pi Lalfakzuali Rokhum, MF&AS; Evacuation Commander-ah DCSO Pu Lianzuala; Information incharge-ah DIPRO Pu Neng Thianlala, MIS; Search and Rescue team hotu ah DSYO Pu Lalngilneia Colney; Fire Safety ah Pu F.Lalchhandama, CO Fire Department; First Aid Team ah Dr KT Lalrammawia, Medical Officer te ruat an ni a, CHANEM building-a sawrkar office leh zirnain a hotute chu Incident Commander atan ruat an ni bawk. Govt. GM Higher Secondary School naupangte chu Rescue Team atan a bik taka sawm an ni.