Vawiin hian Serchhip District chhunga Bank hrang hrangte hnathawh, December 2015 leh March 2016 inkar a mite thlirletna (District Consultative Committee) chu District Consultative Committee Chairman, Dr. Lalrozama, Bawrhsap nibawk hovin Bawrhsap Chamber ah neih a ni.
Dr. Lalrozama, IAS chuan Bank te hi ram mipuite sum vawngtu leh sum leh paia hma kan sawn theihna tura min tanpui theitute an nih avangin kan pan nasa tial tial dawn a, ram tan thil tangkai tak tak pawh an ti nasa tawh hle a ni. Amaherawh chu sawrkar atanga mipuite hamthatna tur Bank kaltlanga tih ngai kawng tam taka kan Bank ten an target an la phaklo thin erawh chu tan lak zual sauh sauh kan mamawh zia tilangtu a ni, a ti a. Serchhip khaw chhunga ATM Booth awmchhunte chatlak lova hman theiha awm tir a pawimawh thu leh Branch tinte venhimna lam kawnga tha zawka ruahmanna siam tul a tih zia a sawi lang bawk.
Report atanga a lan danin Serchhip District chhungah hian Bank pathum, SBI, MRB leh MCAB ten Branch an nei mek a, DCC Report la nei hman lo Bank thar pakhat a awm bawk. Heng bank hrang hrang tea Deposit tling khawm chu Rs. 15002.82 Lakhs niin chuta tang chuan mipuite hnena puk chhuah tir Rs 8817.25 Lakhs a ni a. Deposit neih zat atanga puk chhuah tir tam lam hi zaah 58.77 niin bank ten an puk chhuah tir zat tur bituk chu zaah 60 a ni thunga, an tlin lo deuh a ni.
Agriculture Term Loan leh Crop Loan ah hian District chhunga target neih zat chu Rs. 1288 Lakh a nih laiin a taka an pek chhuah chu 411.16 Lakh chauh a ni bawk a, chu chu za zela 32% ang chauh a ni. Industry ah chuan 96% an pe chhuak a, Service Sector Loan ah target 60% an tlin thei bawk. Heng Priority Sector bika District chhunga Bank ten an target an tlin zawh lohna chu 40% tihna a ni. Crop Loan bikah phei chuan target 22% chauh an tlin a, Crop Loan hi loneitute tan dahkham engmah awmlova Rs 1,00,000 thleng puk theihna Policy a ni.
District chhungah bank hrang hrang atanga loan puk mi 4224 an awm a, loan rulh zawh loh la awm tlingkhawm hi Rs. 5918.85 niin a puktuten an ngaihven zui tak miah loh Loan rulh ngai Rs. 500.12 Lakh zet a awm mek a, Kisan Credit Card hi a tir atangin District chhungah mi 3979 pek ni tawhin chung mite hnena loan pek zawng zawng zat chu Rs. 2016.48 Lakhs a ni a. Hetihlai hian tun kum kalta bika KCC target chu 535 an ni a, Bank ten an pek tak chu mi 166 hnenah chauh a ni thung. PMEGP ah hian 2016-17 chhung atan target mi 146 leh Margin Money Rs 173 Lakhs ruahman a ni a, hei hi Bank hrang hrang ten chan insemin an pe chhuak dawn a ni. Pu R. Ralkhuma, Chief Manager (Lead Bank) Aizawl chuan heng target hrang hrang Bank tana siamte hi an tana target sang ber a ni lovin an lo tih ve ngei tur target hniam ber zawk a ni, a ti a. Chuvang chuan hmasawn an ngaihna lai apianga nasa zawka an beih a tul hle a ni, a ti bawk.
Meeting ah hian Financial Literacy Campaign neih dan tur pawh sawi ho niin mipui tam zawkte hnenah Campaign hi neih a nih theih nan Sawrkar Department thenkhat Farmer training neih mamawhte nena a huhva neih dan ngaihtuah nise, an ti bawk.
He meeting ah hian Serchhip SP Pu Lalringdika, Pu P Datta, Chief Manager, SBI Lead Bank Office, Pu R. Ralkhuma, Chief Manager, Lead Bank Aizawl. District chhunga Bank Branch hrang hrang Manager te, leh Department thenkhat aiawhte an tel a ni.
