Vawiin khan Lunglei District Sanitation Task Force chuan Nghasih Lui humhalhna kawnga hmalakna pawimawh tak – Clean Nghasih Programme under NEDP a buatsaih a. Lunglei District Bawrhsap leh District Sanitation Task Force Chairman ni bawk Pi Lalzarmawii IAS in a hawng. He thenfai hnatlangpui ah hian mi 300 rual thawk chhuakin sawrkar official-te, Lunglei khawpui chhunga Zirna In pathum-Lunglei Government College, Govt J Buana College leh HATIM atanga NSS volunteers te, khawtlang hruaitu VC-te leh tlawmngaipawl hrang hrang aiawhte an tel a ni

Pi Lalzarmawii chuan Lunglei khawpuiin lui kan neih pawimawh berte zing ami Nghasih Lui thenfai hnathlang runpui chuan rah tha tak a chhuah ngei a beisei thu sawiin he programme buatsaihna kawnga chak taka hma la tu District Sanitation Task Force member-te leh UD&PA Department chungah lawmthu a sawi a. Nghasih Lui chu Tlawng Lui fintu a ni a, a tui luang chu Lunglei leh a chhehvel chawmtu tui lakna a luang lut anih avangin a thenfai leh humhalh kawngah nasa takin tan kan lak a tul a ni, a ti. Lunglei mipuiten he lui pawimawhna hi hria a, a humhalhna kawnga kan tanrual a tul a ni, a ti bawk.

A sawi zel naah Lunglei Bawrhsap chuan Lunglei khawpuiin nasa takin Faina kawng a zawh mek a, sawrkar laipui hmalakna Swachh Bharat Mission (Urban) kaltlangin Lunglei khawpui nasa takin a fai sawt a, Lunglei, Tlabung leh Hnahthial chu ODF-ah puan tawh niin tun dinhmunah HPC fund hmangin khawpui chhung kopang (retaining wall) te thenfai leh chei mawi mek a ni, a ti. Faina leh thianghlimna kawngah hmabak nasa tak kan la nei a, khawlai leh vantlang hmun vawnfai kawngah inzirtir kan la ngai nasa hle a ni tiin mipui mimir ten fai duh tak tak na thinlung anlo neih chhoh theih nan kalkhawmte chu an theihtawp chhuah theuh turin a chah a. Faina leh thianghlimna kawnga hmasawn zel tura hmachhawpte sawilangin heng hmalakna te ti hlawhtling turin Lunglei mipuite thawhho puiah a sawm.

Clean Nghasih Lui hawnna programme hi Pu Andrew Lalhruaia, DUDO, Lunglei District in a kaihruai a, Pu Eddie Zonunkima, UD&PA in Technical Report a pe bawk.

Nghasih Lui thenfai hnatlangpui hi ngawrh taka beih niin kalkhawmte chu group thum ah an in thendarh a, lui dung leh a chhehvel fai takin an thian a ni.