3991/2022-2023 

Lunglei the 25^th March, 2023 - World Water Day 2023 puala hmalakna kal zelah vawiin khan Lungleiah ‘Nghasih Lui Thenfai Hnatlangpui’ neih a ni. He hmalakna hi North East Initiative Development Agency (NEIDA), UD&PA, PHED, Project Save Tlawng, Clean Lunglei, KTP Venglai Branch, YMA Sub Hqrs Lunglei leh YMA Ramthar Branch te tangkawp hmalakna niin mi 100 chuang hnatlang tur hian an thawk chhuak a ni.

Hnatlangpui ah hian Lunglei DC & Chairman District Sanitation Task Force Pi Ramdinliani, IAS pawh telin Sawrkar Department-te leh tlawmngai pawl ten an thahnemngaihna avanga Nghasih Lui Thenfai Hnatlangpui an buatsaih chu lawmawm tiin hnatlang tura lo pen chhuak zawng zawngte chungah lawmthu a sawi a. Lunglei khawpuiin lui kan neih pawimawh berte zing ami, kan tui tlan ber Tlawng Lui fintu Nghasih Lui kam leh a chhehvelah bawlhhlawh chi tin reng a tam em em chu veiawm takzet a tih thu sawiin faina leh thianghlimna kawngah hmasawnna tur kan la ngah hle a ni, a ti a. District Sanitation Task Force Chairman chuan Bawlhhlawh paihna hmun atana ruat ah chauh paih thin turin Lunglei District mipuite a chah bawk a ni.

Nghasih Lui Thenfai Hnatlangpui hi ngawrh taka beih niin kalkhawmte chu group thum ah an in thendarh a, lui dung leh a chhehvel uluk takin an thianfai a ni.