Zan khata riaka Ngopa leh a chhehvel khua tlawha zin Food, Civil Supplies & Consumer Affairs Minister Pu H. Rohluna chu nizan khan Aizawl a lo thleng leh ta. A zin chhung hian RGGLV hnuaia Gas Distributor palina M/S Z &D RGGLV Indane Gas Agency chu Ngopa-ah a hawng a, NE Khawdungseia tunhnaia leiminin chenna in a tihchhiat chhungkua te a tlawh a ni. Deputy Chief Whip RL Pianmawia’n a zinchhung zawng hian Minister hi a tawiawm a ni.

Ngopa a Gas Agency thar a hawnnaah Pu H. Rohluna chuan sorkar laipui hmalaknain thingtlang khua ten anmahni puala Gas Distributor an neih theihna tur ruahmanna Rajiv Gandhi Gramin LPG Vitarak Scheme a siam thu leh Ngopa-a Gas Agency thar hawn tak pawh he Scheme kaltlanga siam a nih thu a sawi a. Hmarchhak State pariat zingah Mizoram sorkar chu he Scheme bawhzuina kawnga hma la chak ber a nih thu leh tun dinhmunah khaw paliah Gas Agency thar hawn a nih tawh thu te, khaw dang pakuaah hawn maitheiha peihfel a nih tawh thu leh khaw paruk dangah Distributor tur thlan leh thuai anih tur thu te a tarlang a. Mizoram sorkarin thingtlang khua a cheng te dinhmun a ngaihsakzia leh a ngaih pawimawh zia he hmalakna kal mek hian a tilang a ni, Minister chuan a ti bawk.

Supply Minister Pu H. Rohluna chuan ram mipui te hamthatna tur sorkar hmalakna pawimawh hrang hrang sawi langin Mizoram sorkar flagship programme NLUP thawhkhatna (first phase) pawh chhungkaw 45,000 hnenah sum pekchhuah a nih tawh thu te, a thawhhnihna (second phase) a NLUP dawng tur chhungkua pawh thlan fel a nih tawh thu leh reiloteah sem tan a nih tur thu a sawi a. Kawlphetha siam chhuah kawngah te, Mizoram leilung hausakna haichhuah kawngah te nasa taka sorkarin hna a thawh thu sawiin khawvel hmasawn ruala Zoram mipui te hmasawnpui turin theihtawpin sorkar chuan tan a la a ni, a ti.

Nimin khan Minister hian NE Khawdungsei-ah tunhnaia ruahpui thawk avanga leiminin chenna in a tihchhiat leh luahngamloh a rauhsan tak chhungkua te a tlawh a. He lai hmun hi an bialtu SDO (C) leh PWD hotute pawhin an thlithlai tawh thu te, uluk lehzuala zirchian a tul a nih chuan Geology lam mithiam te pawh tirh theih an nih tur thu te, chhawmdawlna awm thei ang ang ruahman tura hmalak mek a nih dan te a hrilh a. Luahzui ngamloh avanga inthiah tak chhungkaw pahnih te hnenah Minister hian chhawmdawlna hmahruai atan cheng 2000 ve ve a hlan a ni.

Food, Civil Supplies & Consumer Affairs Minister hi Champhai District Civil Supplies Officer Pu Lalhmingliana, Ngopa SDO (Civil) Pu Rolungmuana leh Information & Public Relations Officer Pi Lalnunmawii ten an tawiawm a ni.