Vawiin khan Ngopa-ah India Independence Day vawi 72-na lawmna chu Ngopa Playground-ah neih a ni a, Khuallian ZOHANDCO Chairman Pu R.Vanlalvena, MLA chuan hnam puanzar pawtpharhin, parade contingent-te chibai bukna a chhanglet a ni.

Khuallian Pu R.Vanlalvena chuan India zalenna champha a lo thlenin nakin lawka ram leh hnam hruaitu la ni mai tur sikul naupangte duhsakna chibai buk hmasa a. Zirna tha an neih theihna turin sorkarin nasa takin hma a la a, India ramah ziak leh chhiar thiam lamah 2-na te hial kan ni thei a; zirtirtu tam tak lak thar an nih bakah school building engemaw zat siam that a ni tih a sawi a. Mizoram hmun kil zawka awm te pawhin awlsam zawka zirna sangzawk an neih vek theih nan sorkarin nasa takin hma a la mek zel a, zirna tihhmasawn nan Science leh Commerce sorkarin a ngai pawimawh hle bawk a ni, a ti. Mizo thalaite sports discipline hrang hrang - Football, Basketball, Volleyball, Boxing-ah te khawvel hriat khawpin Mizoate an tihmingtha mek a; infiamna mual phul lem phah tawhna ringawt pawh hmun 14 laiah a awm tawh a, kan thalai infiammiten pawisa an lakluh pawh a tam tham hle tawh a ni, a ti. Lengteng Constituency thuamchhungah hmasawnna nasa tak a awm zel chu a vanneihthlak hle a, tunah pawh hmasawnna hna thawh mek - Hliappui to Changzawl Truck Road, Ngopa to Lamzawl Truck Road, Vankal approach road, Ngopa to Mimbung Road resurfacing bakah Mimbung, Hrianghmun, Chiahpui,  NE.Khawdungsei leh Khawkawn-ah te Solar Pumping bun mek a nih thu a tarlang bawk.

Khuallian chuan Ngopa-a Independence Day 2018 puala lawmman hrang hrangte a sem nghal a ni.