Vawiin khan Mizoram Legislative Assembly Speaker Pu Hiphei chuan Kolasib khawpui chhunga hmun hrang hrang heng District Jail, District Hospital leh Vengthar a Boys Orphanage Home: Enna In te a tlawh.

He hunah hian Speaker chuan Jail tang te chu fuihin Jail an tan avanga sual bik ta riaua in ngai mai loin, thil tih sual palh an nei avanga tang mai an ni a, Jail a an tan hun chhungin thlarau lam damna te neih tumin Pathian chu theihtawpa bel turin a chah a, mahni indawm kun mai loin hma lam pan a hringnun beisei awm zawk leh eng zawk zawh tura tan la sauh sauh turin a fuih bawk a ni. Pu Hiphei chuan Prisoner welfare fund a tan sum fai cheng 10,000/- hlan in, Jail tang te mamawh Guitar leh Volleyball 3 chu a leisak tur thu a tarlang bawk.

Hemi bakah hian District Hospital poor Fund a tan leh Enna in (orphanage Home) ina an hman turin sum fai cheng 10,000/- ve ve hlan in, Kolasib District Football Association hman a tan Sum fai cheng 5000/- a hlan bawk a ni.

Speaker Pu Hiphei hi Kolasib Bawrhsap Dr.Arun T, IAS, Kolasib SP Pu Abhisek Dhania, IPS leh District Officer hrang hrang ten an tawiawm a ni.