Vawiin khan Thenzawl-ah Independence Day lawmna chu Thenzawl Public Playground-ah hman a ni a; Khuallian Deputy Speaker R.Lalrinawma chuan hnam puanzar pawtpharhin, parade contingent-te chibai bukna a chhanglet a ni.

Khuallian Deputy Speaker R.Lalrinawma chuan thu sawiin a zalenna kum 72-naah chuan India chu khawvela ram ropui leh thang duang ber pakhat niin tehna hrang hrang atanga thlirin khawvela ram chak leh thiltithei berte zingah a lang pha thuai tura ngaih a ni a ti a. India ram bung tinte hian he ram chhunga chengte inpumkhatna tur te, a chakna leh hamsawnna tur te a theihtawp chhuah hi kan mawhphurhna a ni, a ti bawk. Ram hmasawnna atana sorkar laipui leh state sorkarin hma an lakna kawng hrang hrangah tha leh zung thawha, New India 2022 hmathlir tipuitling tura ram pumin chak taka ke pen lai hian, ramchhung hmun dangte ruala Mizoramin ke a pen ve theihna turin thahnemngai taka sorkar hmalaknate tawiawm turin mipuite a sawm a ni. Thenzawl huamchhunga sorkar hmalakna hrang hrangah mipuiin sorkar an tawiawm a ngaihna apiangah theihtawp chhuah turin a chah bawk.

Independence Day 2018 lawmna chi khat atan Thenzawlah Volleyball Tournament buatsaih a ni a, heta lawmman late chu Khuallian nupui Pi Lalhlupuii’n a hlan a ni.