Vawiin khan Ngopa Civil SDO Pisa-ah Ngopa leh a chhehvel khuaa ruihhlo do tu pawl hrang hrangte chuan awmze nei leh hlawkzawka ruihhlo do a hmalak dan tur sawihona leh inrawnkhawmna, Ngopa SDO Civil Pu Vanlaltanpuia hovin an nei.

He hunah hian Ngopa leh a chhehvel khuaahte tunhnaiah ruihhlo a bikin No.4 leh Ganja a hluar hle thu tarlan niin, ruihhlo do kawnga a huhova tan lak dan tur kawng hrang hrangte chipchiar taka sawiho anih hnuah bawhzui nghal tura lungrual taka pawm a ni.

Meeting-ah hian Ngopa Civil Sub-Division hnuaia khaw hrang hrangte chu ruihhlo leh a kaihhnawih do kawngah lungrual taka thawkho a, a tul ang zela inpuih tawn ni se tih a ni a. Ruihhlo do kawngah chak zawka inbiakpawha hmalak zung zung theihna turin khaw tin aiawh telna WhatsApp Group siam ni se, hmalakna leh hmasawn dante kum tin tum 2 emaw tal thlirho thin ni se tih a ni a. Hmun dang atanga Ngopa Civil Sub-Division huamchhunga ruihhlo la thinte chhuichian a, anmahni leh lirthei hman thinte ngaihvena khaw hrang hrangte inhriat tir thin leh a tul anga enzui bik nise tih a ni bawk.

Zau zawka ruihhlo do beihpui thlak anih theihna tura hmalak ngaihnate sawiho niin, ruihhlo do chuan ramri kham neilo se, ruihhlo vanga man an lo awm a nih chuan a mantu khuain dan ang taka an chunga ro an rel danah a khaw neitute’n an thlavang hauhsaklo se ti a rel a ni a. Ruihhlo do kawnga tangkai em em Ngopa Police thuam chaka Police tam zawk dah angaih thu pawh tarlan a ni a. Ngopa Civil Sub-Division huam chhunga sorkar phalnaa damdawi zuarte hnenah damdawi hralhchhuah chungchangah fimkhur lehzual angaih thu thlen nise tih leh ruihhlo do kawngah an theih anga tha thawh ve tura ngenna siam nise tih a ni bawk a. Heng bakah hian Tuihmui leh Vanzau (Myanmar) lama ruihhlo (No.4) zuar thin ni a rinhlelh te’n an tihtawp ngei theihna turin SDO Civil, Ngopa-in a tul angin hma lo la se tih a ni bawk.

Vawiin ruihhlo hluar zel tur ven kawnga inrawnkhawmna hunah hian Ngopa leh a chhehvel khua atangin VC, YMA, MHIP leh VDP hruaitu mi 60 zet an kalkawm a ni.