Vawiin khan Blessino Nursing School chuan a vawikhatna atan Capping and Lamp Lighting Ceremony an hmang a. ATI Auditorium, Mizoram New Capital Complex-ah programme urhsun tak buatsaihin Health Minister Dr R.Lalthangliana chu khuallian a ni a, Law Minister Pu TJ Lalnuntluanga chu khual zahawm a ni.

Dr R.Lalthangliana chuan nurse zirlaite chu tihdam rawngbawl hna thawktu, mahni mihringpuite rawngbawl hna ropui tak thawktute an ni, a ti a. An zirchhuah hnuah certificate aia pawimawh zawk chu an thiamna a taka midangte rawngbawl nana hman tangkai hi a ni, a ti. Bul tan that a pawimawh tiin Health Minister chuan Nursing School din thar Blessino Nursing School chu a bul atanga theihtawp chhuaha record tha tak nei tura tang turin a fuih a. Mizoram chhung chauh nilo, India ram hmun dang leh ram pawn thlenga chhawr tlak, mi tuarchhel leh mi thiam chher chhuak turin duhsakna a hlan a ni.

Pu TJ Lalnuntluanga pawhin mihring nunah hlawhtling turin tumruhna, tihtakzetna leh taimakna a pawimawh a ti a. Zirlaite chu an kalkawngah harsatna an lo tawk a nih pawhin bei tang tang turin a fuih a. Nurse zirlaite leh Blessino Nursing school chu midangte tana malsawmna ni turin a chah a ni.

September ni 13, 2019 khan Blessino Nursing School hian Mizoram Nursing Council hnen atangin din phalna an hmu a. Blessino Welfare Society enkawl niin Indian Nursing Council-in he school hi a pawm (recognize) a ni. Batch khatah hian General Nursing and Midwifery (GNM) zirlai 30 an awm a. November ni 7, 2019 khan class an kal tan a ni.

Capping and Lamp Lighting ceremony ah hian Mizoram Nursing Council President leh Mizoram College of Nursing Principal ni bawk Pi Lalchhanhimi’n zirlai 30 te hi lukhum a khum tir a ni.