Lamlian NH-154 a Chainage 94.200 kmp a awm, Bairabi khaw bul lawk Kawnpuilui Bailey bridge thawmthat hna chu zawhfel niin vawiin khan hlawhtling takin Load Test neih a ni.

He lei hi kum 1988 khan dawh niin feet 130 a sei a ni a. A tir ah chuan Metric Tonne 20 rit phur ang chu motor zawh thei tura duan a ni a. Lei dawh atanga kum 26 hnu kum 2014 khan tha taka repair a ni a. Amaherawh chu ram hmasawn zel ah Kawngpui te pawh a lo tha chho zel a, motor lian zawk leh rit tak tak quintal 300-400 lai phur thei te hi Mizoram kawngpui ah an lo tlan ve thei ta a. He lei hi Bairabi Rail station atanga Mizoram hmun hrang hrang a buhfai phurh chhuahna kawng pawimawh taka awm a nih avangin leh motor lian load tam/rit zawk phur te him zawk an tlan theih nan he lei hi thuam chak (strengthen) chu ngaipawimawhin tunhnai khan Mizoram PWD chuan hma an la a, vawiin khan he lai thuamchak hna chu zawhfel a ni ta ani.

PWD Engineer-in-Chief Er. R. Vanlaltluanga hmalaknain he lei hi Metric Tonne 20 atangin Metric Tonne 30 rit phur dawl zo tura strengthening hna hi emergency a thawh ani a. Mizoram hmun hrang hrang atangin part mamawh awm ang ang te lak khawm a nih bakah phai lam atangin part tam zawk hi chah a ni bawk a, motor leh thlawhna hmang a rawn phurh thlen an ni.

He lei thuamchak hna hi Superintending Engineer, PWD, Mechanical Circle Er. Lalhmunsiama enkawlna hnuaiah July ni 4, 2016 khan thawh tan a ni a, vawiin July ni 13, 2016 hian tluang takin zawh fel a ni. Hna thawh hun chhungin motor kal theih a ni lova, kawng hmang tu mipui ten dawhthei tak leh hrethiam tak PWD an ngaihchan avangin PWD chuan mipuite hnenah lawmthu an sawi a. District administration leh sawrkar department dang ten tha taka an tawiawm avangin an chungah lawmthu an sawi bawk.

Vawiin dar 2:30 PM khan Executive Engineer, PWD NH Division-I, Er H. Zoramliana kaihhruiana in load test hlawhtling taka neih a nia a, he lei hian a zawh tur anga duan Metric Tonne 30 rit phur motor ten a zawh tih tha taka finfiah a ni.