India rama National Highway neitu, Ministry of Road Transport & Highways (MORT&H) ruahmanna angin, NH-54 thenkhat, Zembawk dai atanga Tuipang thlengin, National Highways & Infrastructure Development Corporation Limited (NHIDCL) enkawl turin November 1, 2019 khan State PWD chuan a hlan fel ta a. Hemi ni atang chuan he kawng chungchang chu State PWD mawhphurhna a ni dawn ta lo a ni.
 
NH-54: Aizawl-Lunglei hi BRO atanga State PWD-a pek turin MoRT&H chuan 6.5.2008 khan thupek siamin, a bak Silchar -Aizawl tan 26.9.2008 khan thupek dang a chhuah leh a; engemaw harsatna avangin April, 2010 khan BRO chuan State PWD kutah a hlan ta chauhva. PWD-in kum 9 a enkawl hnuah tunah hian kawng thlur hnih (double lane) a sial turin NHIDCL kutah hlan a ni leh ta a. An ni hian Contract hna 8-ah thenin contractor 8-in an thawk dawn a. Japan International Co-operative Agency(JICA) atanga loan hmangin an thawk dawn a ni.
 
NHIDCL hi National Highway Authority of India (NHAI) ang bawk a India Sawrkar laipui ta niin, N-E State zawng bakah Jammu & Kashmir leh Himachal Pradesh a National Highway te chu State PWD nen an in enkawl sem dawn a. An ni hi BJP Sawrkar hmasak a din thar, MORT&H te, BRO leh State PWD atanga thawktu lakkhawm an ni a. Mizoram enkawltu General Manager chu SIRD Building, Durtlang-ah awmin, Project Manager Office chu Serchhip, Lunglei leh Lawngtlai-ah dah an ni bawk a. Anmahni dawr duh chuan heng hmun ah te hian dawr theih an ni ang.
 
Mizoram tana lamlian pawimawh sial tur an nih avangin, harsatna siam zawng ni lova, hna chak leh tha taka a kal theih nana NHIDCL leh an Contractor-te lo tawiawm turin PWD chuan mipuite a ngen a ni.