Mizoram PWD chuan a hnuai ami ang hian thuchhuah an siam : 

Seling - Champhai kawng chhiat chungchang hi 11^th October, 2017 chanchinbu thenkhatah a lo lang a. Chanchinbua tarlan ang hian he kawng hi National Highway-ah 4^th March, 2014 ah puan niin, 17^th February. 2015 ah Mizoram Sawrkar kuta awm tura tih a ni a. State PWD kutah erawh he kawng hi a enkawl mektu BRO-in an hlan nghal lo. A enkawl mektu BRO hnenah PWD-in hlan chhawng tura a ngen chung pawhin anmahni lamah remchanlohna hrang hrang avangin 31^th March, 2017 khan State PWD kutah an hlan chauhva, hlan tlai anih chhan chu BRO hriat chi a ni a, State PWD chuan a chhan a hre lo. 

State PWD kuta awm tur anih avangin BRO-in la hlan lo mahse lo inhmakhua lawkin. 2015 atang khan Seling - Keifang leh Kawlkulh - Khawzawl inkar siamthatna tur estimate Central lamah thehlut lawkin tender pawh koh lawk diam a ni a. Keifang -Kawlkulh leh Khawzawl - Champhai erawh chu khatih lai khan pawisa awmin a daih loh avangin tun kum kal mekah hian estimate siamin Central lamah thehluh mek a ni. 

Seling - Keifang leh Kawlkulh - Khawzawl hi hnathawh thuai atul avangin BRO-in an hlan hma leh sanction pawh hmuh anih hmain December 2015 tir khan tender chhuah lawk a ni ve ve a. Tender reng reng hi State chhunga tihfel mai theih loh anih avangin Ministry of Road Transport & Highways lamah rei tak a thang thin avangin a fel mai thei lova. Vawi engemawzat umzui hnuah Seling - Keifang hi September 2016 khan Contract pek fel a ni a. Kawlkulh - Khawzawl hi chu chhangtu tling hmuh loh avangin July 2016 ah tender nawn leh a ni a. Ministry of Road Transport & Highways lamin an rawn tihfel har avangin February 2017 khan Contract hi tihfel chauh a ni. 

Seling - Keifang chu thal chhung khan thawk nghal in Km 13 chuang zawh hman a ni a. Fur a nasat hma em avangin zawh hman a ni ta lova, thal leh ah hian zawh a ni ang. Kawlkulh - Khawzawl erawh chu Agreement sign hnuah Contractor a inbuatsaih mek laiin March 2017 atanga fur a intan tak avangin awmze neiin hna an thawk hman ta lo a ni. 

Chanchinbua he kawng sanction ni leh sanction zat ziak pawh hi a dik lova Seling - Keifang sanction zat chu Rs. 1665.67 lakhs niin, ni 29.12.2015-a sanction a ni a; Kawlkulh - Khawzawl sanction amount chu Rs. 1595.71 lakhs niin, sanction ni chu 29.12.2015 bawk a ni. 

State Sawrkar hian he kawng hi neitu chan chang takin BRO kuta a awmlai pawhin a lo in hmakhua lawk a: a mawhphurhna tur a ni tih hriain ruahmanna fel tak a lo siam lawk zawk a ni.