Sorkar laipuia Ministry of Home Affairs chuan ni 14.9.2017 khan Protected Area Regime in Manipur, Mizoram leh Nagaland chungchangah thuchhuah (Circular No.493) siamin heng state 3 Chief Secretary te hnenah hian lehkhathawnin an hriattir.
Ministry of Home Affairs thuchhuah chuan Manipur, Mizoram leh Nagaland state huamchhung Foreigners (Protected Areas) Order, 1958-in ‘Protected Area Regime’ hnuaia a dah chu kum 5 dang atan sut leh (relaxation) a nih thu leh hei hian ni 13.12.2017 atanga 31.12.2022 thleng a huam leh ang tih a tarlang a. Hemi chungchangah hriattur pawimawh a tarlan telte chu :
1. Dan leh thupek kenkawhna lamah harsatna a thleng a nih erawh chuan Sorkar laipuiin he a relaxation hi a sut thei.
2. Afghanistan, China leh Pakistan khua leh tuite erawh chuan Manipur, Mizoram leh Nagaland State an luh hmain Ministry of Home Affairs atangin phalna (approval) an lak hmasak a ngai a. Ministry phalna tel lova heng state 3-a lutte chu Foreigners Act hnuaiah man leh hrem theih an ni ang.
3. Heng State 3 - Manipur, Mizoram leh Nagaland - a rampawn mi (foreigners) khualzin zawng zawngte chu State/District-a Foreigners Registration Officer (FRO) ah darkar 24 chhungin an in-register tur a ni.
4. Manipur, Mizoram leh Nagaland State Sorkar te chuan an state chhunga foreigner lo lutte che vel uluk taka thlithlai a nih theih nan FRO leh Police thuneitute chu an mamawh anga thuamthat turin a hriattir.
Myanmar khua leh tuite heng State 3 - Manipur, Mizoram leh Nagaland - a lo lutte tan Protected Area Permit an lak ngai thin chu kum 5 dang (ni 01.01.2018 atanga 31.12.2022 thleng) sut a ni bawk a. Amaherawhchu, Myanmar khua leh tui heng State 3-a lo lut turte chuan India Missions/Posts atangin Visa lak hmasak tur a ni ang a. Darkar 24 chhungin State/District FRO ah in-register ngei ngei tur a ni. Myanmar khua leh tui heng State 3-a by road-a lo lut mahse cham hlen tum lo te tan in-register a ngai lovang. State/District FRO te chuan state chhunga an che vel erawh uluk takin an thlithlai reng tur a ni.
