No.3584/2021-2022

Aizawl the 7th January, 2022 : Vawiin khan rampum huapa ni 100 chhung lehkha chhiar campaign neih mek chu School Education Directorate Conference Hall-ah hawn a ni a. School Education Secretary Dr Lalzirmawia Chhangte-in he campaign hi a hawng.

Dr Lalzirmawia Chhangte chuan he hunah hian thu sawiin hnam hmasawn nan leh lungrual nan leh kawng hrang hranga hmasawn nan lehkha chhiar hi a pawimawh a, lehkha chhiar boruak siam thar leh a ngai a ni a ti. Secretary chuan lehkha chhiar hlutna sawiin tunlai khawvelah electronic hmanrua a lo hluar a, hei hian lehkha chhiar a ti tlem a, mi zawng zawngin mobile phone leh laptop te an khawih nasa ta hle a, heng khawih nasat hian hriatna tha nei turin lehkha chhiar ai a awh zo lova, lehkha chhiar tluk a awm lo a ti. Lehkha chhiar hi hriatna khawvela an zuan luh vena a ni a, rilru zir miten an sawi danin lehkha chhiar hian thluak a tichak a, chauh rimtawng a ti tlem a, muttuina te pawh min pe a, depression a ti tlem a, dam hun chhung a tisei bawk a ni a ti. Ni 100 chhung lehkha chhiar beihpui thlak chu tha taka bawhzui turin thawktute leh kalkhawm te a sawm a ni.

Pi Lallianzuali Bawihtlung, Dy Director, School Education chuan Ni 100 chhung lehkha chhiar beihpui thlak dan tur a sawi a. He programme hi rampum huapa kalpui mek a ni a, Union Minister-in a hawn hnuah state hrang hrangin hawnna te neiin an bawhzui mek a ni a ti. He programme hi Class VIII chin hnuai lam tan a ni a, naupangte tan lehkha chhiar chu phurrit ni lova, a hlimawm thei ang bera chhiartir tur a ni tih a sawi bawk. January 21 hian International Mother tongue day hman a ni dawn a, mahni tawng ngeia lehkha chhiar lai online a tihlan tur a nih thu a sawi bawk.

School Education Director Pu James Lalrinchhana kaihhruai he hawnna hunah hian Secretariat leh Directorate a officer-te, Samagra Shiksha, SCERT, SDEO te Teachers Association hruaitute, CYMA, MZP leh MSU hruaitute an tel a ni.