No.424/2020-2021

Government of Mizoram, Disaster Management and Rehabilitation Department chuan COVID-19 hripui darh zel tur venna atana hmalak dan tur thupek, ni 16.04.2020 khan a chhuah a. He thupek behchhan hian a hnuaia hriattirna hi chhuah a ni a, Lunglei District-a mi zawng zawng in an zawm vek tur a ni.

A. MIZORAM PAWN ATANGA BUNGRAW PHURTUTE CHUNGCHANG
1. Driver leh handyman te, Mizoram atanga phaia bungrua la a zu zin te chu Lunglei District an rawn luh a, an bungraw phurh te an hlan thlak fel veleh Sorkarin Quarantine Centre a siamah an awm anga, hemi atang hian bungraw phur turin Mizoram an chhuahsan leh thei ang.

Bungraw la-a Mizoram chhuahsan chhunzawm tawhlo te chu load an lak hnuhnun ber atanga ni 14 hnuah an in lama haw phalsak an ni ang.

2. Mizoram pawn lam lirthei driver leh handyman, State pawn atanga bungrua rawn thiar lut thin te chu an kalphung pangngai angin khaw daiah anmahniin eirawng an in bawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang.

An bungrua unload chhung hian motor-ah an awm reng tur a ni. Loh theihloh thil avangin motor atanga an chhuk a tul pawhin midang atanga feet ruk (6) tal a hla ah an awm tur a ni.

Driver leh handyman te awm dan tur ruahmanna hi zawm a nih ngei theihnan dawr/bungrua neituten hma an la tur a ni.

B. BUNGRAW CHAWKLUH DAN
1. State pawn atanga bungraw lakluh theih zingah nitin mamawh (essential commodities) te chu phalna hranpa lak ngai lovin lak luh theih a ni ang. Amaherawhchu, SDO(C), Vairengte emaw SDC, Bairabi hnenah declaration (prescribed form hmangin) an thehlut ngei ngei tur a ni.

2. Nitin mamawh (essential commodities) ni lo, ei leh bar zawnna leh hmasawnna atana mamawh bungrua - steel, cement, brick, balu, insakna bungrua ilo - la lut tur te erawh chuan hemi atana dilna form siam hmangin Deputy Commissioner kaltlangin Home Department phalna an la hmasa tur a ni.

3. Mizoram chhunga thilsiam, vulh leh tharchhuah te chu Mizoram chhunga hmun hrang hrangah bungrua chet tanna tur district a Deputy Commissioner te phalna-in thawn chhuah theih a ni ang.

C. DAWR HAWN CHUNGCHANG
1. Nitin (Sunday tiam lohin) eibar zawrhna dawr te chu dawr awmna veng VLTF-te hriatpuina in zing dar 7 atangin chawhnu dar 2 thleng inhawn tur a ni. Hei hian Lunglei Town area leh khaw dang zawng zawng a huam vek ang.

Dawr bungraw lam tur emaw damdawi lei tur reng reng chuan a chenna VLTF lehkha a la ngei tur a ni.

2. Thu leh awm hma chuan zing dar 7 leh chawhnu dar 2 inkarah Civil Hospital hnuai leh SP Office hlui inkarah a hlawma dawr bungrua la tur lirthei lo chu dah phal a ni lo. Hei hian Official leh Duty dangte lirthei dah a huam lovang.

3. Dawmdawi dawrte chu an inhawng reng tur a ni.

4. Bungraw phur motor mamawh, oil leh spare parts zawrhna dawr, loh theihloh thila hawn ngai hetiang motor siamna bik workshop/punture works dawr te chu VLTF-ten hawn phalna an pe thei ang.

5. Ei leh bar zawrhna leh hmasawnna hna peng hrang hrang thawhna atan a bungraw mamawh - steel, cement, brick, balu, insakna bungrua ilo zawrhna dawrte chu VLTF-te hawn phalna an pe thei ang. Heng dawrte hian a tam thei ang berin spot delivery kalpui thei tura beisei an ni.

6. Hmun khata mipui pungkhawm tur ven nan bazarpui (Sobji Bazar)-a thlai leh thil dang zawrh khap a ni a. Chutih rualin mipui mimir in awlsam taka thlai leh chawhmeh an hmuh theih nan veng hrang hrangah leh hmun tam zawkah chawhmeh lei theihna tur DC leh VLTF ten ruahmanna an siam ang.

D. HNATHAWH CHUNGCHANG
1. Electrician, plumber, mechanic, thing leh cement mistiri leh helper-te chu an hnathawhna VLTF-te hriatpuina in hnathawh phalsak an ni.

2. Carpentry workshop, steel fabrication workshop, bakery, tailoring, weaving leh hetiang lam thil thawhna te chu VLTF ten hawn phalna an pe thei ang.

3. Lo neitu leh huan neitute, ran vulhtute, sangha dil neitute leh a thawktute chu phalna hranpa lak ngai lovin an hna thawh phalsak an ni.

4. DC phalna in quarry a lung lak, block/ brick siam, rawra her leh chhut leh thingzaikhawl (saw mill) a thingzai theih a ni ang.

5. Hnathawhna ah hian hmun khata mi 5 (panga) aia tam awmkhawm erawh chu khap a ni.

E. ZIN VEIVAH LEH MIPUI CHET VEL CHUNGCHANG
1. Inter-State leh inter-district ah mipui zin leh veivah khap tlat a ni. Hei hian Sorkar in thil tul bika a koh / phalsak te a huam lovang.

2. VLTF-ten State danga kal phalna an pe thei lovang.

3. Chhiat tawh thilah thisen zawmpui chhungkaw hnai zual bik leh damloh na avanga loh theih loh thilah chuan Deputy Commissioner hriattir in an awmna VLTF-te phalna in State chhunga hmun dangah kal theih a ni ang.

F. HRIATTUR PAWIMAWH DANGTE
1. Lockdown chhung hian mi 5 (panga) aia tam punkhawm khap tlat a ni.

2. Tul bik thil - damdawi lei, buhfai/ration lak, chawhhmeh leh ei bar lei tura chhuah lawk - tih lohah chuan tumahin mahni in leh compound an chhuahsan tur a ni lo.

3. Loh theih loh thil a nih loh chuan, kum 65 chin chunglam te leh taksa hriselna lama harsatna nei sa te chu inah inkharkhip vek tur a ni.

4. Pawn chhuak tur leh damdawiin a kal tur reng reng chuan (face mask leh hmanraw dang hmangin) hmai an tuam ngei tur a ni.

5. Vantlang hmun leh dawr a kal te chu metre khat tala inhlata awm tur a ni.