495/2023-2024
Dated Serchhip, the 18th May, 2023: Vawiin tlai khan Pu Vanlalnghenga, SP, Serchhip chuan nimin piah ni 16.05.2023 zing lama Chhiahtlang daia Pu Lalsangzuala S/o Pu Lalhmahruaia, Mission Vengthlang in vanduaina tawka thihna hial a tawh chungchanga thil tisualtu an chhui zui dan leh rinhlelh an man dan chungchang Media mite hnena hrilhhriatna (Press Briefing) a nei.
Pu Vanlalnghenga chuan, ni 16.05.23 zing dar 5:45 AM khan mi tu tih hriat loh ruang chhar a nih thu Serchhip Police Station ah dawn a ni a, thu dawn danin Chhiahtlang khaw mi nupa feh kal turin NH54 kawngpuiah thisen leh mobile phone hmuin lirthei chesual awm niah an ngai a. An han enchian chuan kawng thlang meter 20 velah mipa ruang an hmu ta mai a, YMA te rang taka hrilhin annin Police Station ah an hriattir ve nghal a ni. Police lam ten uluk taka an enin tualthahna hnuhma ni ngeiin an ngai a, thubuai an ziak lut nghal a. Mitthi hi an zawhchianna atangin Pu Lalsangzuala kum 31, Pu Lalhmahruaia fapa, Mission Vengthlang, NHIDCL a Computer Operator hna thawk mek a ni tih finfiah a ni.
Pu Lalsangzuala motor Bolero MZ-01U 9639 chu Chhiahtlang khaw chhung YMA Run bulah kawng sirah thing chhehkhawmah tlan lawmin hmuh a ni bawk a, thil awmzia enin tual thattu hian Pu Lalsangzuala a thah hnuah a ruang hi kawng thlangah a paih a, a mi thah motor hmang hian tlan chhiat a tum niin a lang. He thil thlen hun hi zing dar 2 leh dar 5 inkar vel nia rin a ni. Pawi khawihna hmunhma te hi mipuite chimbuai theih loh tura ven nghal a ni.
He pawikhawihna chhuizuitu tur bik Special Investigation Team, Pu Kaste Romalsawma, SDPO kaihhruaina hnuaiah din nghal a ni a. Anni hian Police Station hrang hrangte be pawp nghalin hna an thawk nghal a. He thil thleng kaihhnawiha pawimawha rin mi chi hrang hrang te biain, thil thlen lai vela kawngpui paltlangtu lirtheite ngun takin an chhui a, pawi khawihtu tlan chhiat zui zel theihna tur nia ngaihte pawh chipchiar taka an dap kual hnuah he pawi khawihtu ni ngeia rinhlelh hi an hre ta a ni.
He misual hian pawi a khawih hnuah a mi thah pawisa chu laksakin, a mi thah motor vek hian Aizawl lam panin a tlanchhia a, mahse a chetsual zui avangin motor hi Chhiahtlangah kawng sirah hnutchhiahin kein a tlan chhe zui ta niin a lang a. Chhiahtlang - Lamchhip road zawhin Mat lui a thlen thlak hma deuhvin Sumo Service a lo phar a, Aizawl a lut ngei nia rin a ni ta a ni.
Thil awm dan uluk taka zir a nih hnuah Police Station hrang hranga Case engemawzat awrh mek Lawrence Laldinthara, kum 42 chu tual thattu ni ngeia hriat a ni ta a, muangchang lovin Special Investigation Team mi pali ten Inspector V.L Ramhluna hovin Aizawl an pan nghal a, Aizawl District Police te puihnain ni 17.05.23 khan rinhlelh hi an man nghal a. Hemi ni tlai dar 5:10 PM khan dan hmaah a chungthu rel turin Central Jail-ah dahluh nghal a ni, tiin an hnathawh dan tlangpui a tarlang a ni.
Tualthattu nia hriat chhuichhuahna kawngah khawtlang mipui, khawtlang hruaitu leh YMA te puihna Police in an dawng tha hle a, lawmthu an sawi tak zet a ni.
Pu Vanlalnghenga chuan, hnu chhuina atan pawi khawihna thlenna hmun vawnhim hi a pawimawh em em mai a. Pawi khawihna hmun (Crime Scene) kan vawnhim poh leh hnu chhui a samin hma lakna a awlsam thin. Hei hi mipuiten min hriat sakin min pui tha deuh deuh thei se kan duh tak zet a ni, a ti a. Tun tuma thil thlenna hmun pawh rang taka venhim leh hung a ni a, hnuhma enfiah turin Aizawl atangin Forensic Expert te pawh rang takin an lo kal a ni, a ti.
He tual thihnaa mawhphurtu hian a phu tawk ngei hremna a hmuh theih nan kan theihtawp kan chhuah dawn a, a tul ang zela min thawhpui tur leh kan hnathawh tibahlah thei tu belhchian dawl lo leh midangte ti chiai thei thehdarh lo turin mitinte a sawm nghal a ni.
Pu Vanlalnghenga hi Pu Saidingliana Sailo, Addl. SP, Pu Kaste Romalsawma, SDPO & SIT leader leh pu K. Saitluanga, DIPRO ten an tawiawm a ni.
