No.4165/2020-2021
(Download)
State Disaster Management Authority, Mizoram chuan dt. 31.07.2020 khan National Executive Committee, Ministry of Home Affairs, Govt. of India Order dt. 29.07.2020 atanga inkaihhruaina thu a hmuh angin state chhunga inkhuahkhirhna thlah dulna leh economic activity hrang hrang hawn phalna a lo chhuah tawh a. Amaherawhchu tun hnaia state chhunga COVID-19 case hmuhchhuah thar zingah primary leh secondary contact zinga positive engemawzat an tel tak avangin mipui mimir zingah he hrik hi a darh zau zel loh nan mipui pawn veivak tam rih loh leh economic activity pawh khuahkhirh rih a tul nia hriat niin, hemi hunchhung hian chak zawka COVID positive te contact-te test a nih, high risk group zinga random testing tih a nih theih bawk nan a hnuai a mi ang hian Pu Lalnunmawia Chuaungo, Chairman, State Executive Committee, chuan Aizawl Municipal Area huamchhung tan Section 22(2)(h)& 24(l) of the Disaster Management Act, 2005 in thuneihna a pek angin August ni 16,2020 zan dar 8 atanga August ni 21,2020 zing dar 4:30 thleng inkharkhip dan tur thupek a ti chhuak.
He hun chhung hian Lengpui Airport chu khar a ni dawnlo a, AMC area pawn zawng tan dt. 31.07.2020 a order chhuah tawh kha rin tlang tur a la ni ang.
Hei hian a hma-a lockdown kaihhruaina lo chhuah tawh chu hemi hun chhung atan hian a luahlan ang.
1. Lengpui airport chu hawn chhunzawm a ni ang. Amaherawhchu, Lengpui airport atanga Mizoram rawn lut tur te chuan mCOVID-19 mobile application a mFlight emaw mcovid19.mizoram.gov.in a mpassFLIGHT hmangin phalna an la hmasa tur a ni.
2. Pawn lam atanga Aizawl municipal area a luh leh Aizawl municipal area atanga chhuah (zin veivah) khap a ni. Hei hian Home department-in Mizoram luh phalna a pek te, Mizoram pawna chhuak tur te, damlohna (medical emergency) leh chhiat tawh thil-a chhungkhat hnai zual (pi leh pu, nu leh pa, tu leh fa leh pianpui unau) te veivahna a huam lovang.
Medical emergency leh chhiat tawh thilah te chuan Deputy Commissioner, Aizawl phalna lak tur a ni a, phalna dil dan tur kalphung (online/offline) erawh chu Deputy Commissioner, Aizawl in mipui hriat atan a puangzar ang.
3. Aizawl municipal area pawn aṭangin nitin mamawh (essential commodities) chauh lak luh phal a ni. Heng bungraw chawkluh leh Aizawl atang/paltlanga heng bungrua te thiar chungchangah Deputy Commissioner in ruahmanna a siam ang.
4. Aizawl municipal area-ah chuan nitin mamawh (essential commodities) zawrhna dawr te chu Deputy Commissioner leh LLTF te ruahmanna siam angin hawn theih a ni ang. Dawrkai te hian hand sanitizer, anmahni dawrtute hman tur dahin social distancing an zawm tha tur a ni. Tin, anmahni dawrtute hming, veng, phone number leh an rawn dawr hun ziah luhna register siamin dawr neitu ten an ziak lut vek tur a ni.
5. Essential commodities dawr hawn phalsak te hi (damdawi dawr tiam lovin) tlai dar 5:00-ah khar vek tur a ni.
6. Zirna in, training institute leh sakhaw biakna hmunte chu khar chhunzawm zel a ni ang. Aizawl municipal area chhunga undergraduate leh postgraduate examination (off-line) te pawh thulh rih a ni anga, online examination erawh chu kalpui a ni ang.
7. Mitthi vuina-ah mi 50 aia tam punkhawm khap a ni. Mitthi vui chungchangah chhiatni/thatni chungchanga Order ni 13.08.2020 a chhuah khauh taka kenkawh tur a ni ang.
8. Aizawl municipal area huamchhunga chengte phalna nei lovin tumahin mahni in leh compound an chhuahsan tur a ni lo. Hei hian a hnuaia mite leh an veivahna motor a huam lovang:
a) Heng Department: Health Department thawktu - Police, Home Guards & Civil Defence, Fire & Emergency Services, Prisons-te, Disaster Management & Rehabilitation, Food Civil Supplies & Consumer Affairs, Civil Aviation, Excise & Narcotics, State Election Commission leh Village Council/ Local Council inthlan buatsaihna kaihhnawih office-a thawkte leh PWD/PHE/P&E Department-a essential services bik
b) COVID-19 duty Sawrkar hnathawk a chunga tarlan tel Level Task Force member leh volunteer-te
c) Medical leh veterinary emergency duty leh hospital-a thawktute
d) Mizoram Kohhran Hruaitu Committee member
e) Bank, ATM, postal, telecom service provider leh Food Corporation of India-a hnathawkte.
f) Print & electronic media, cable leh internet service a thawkte
g) Bawnghnute sem leh bawlhhlawh paih hna thawktute
h)Petrol pump leh LPG delivery a thawktu
i) Courier, home delivery leh e-commerce service-te.
j) Private security service
k) Airport atanga thlawhna a lo haw quarantine tur buaipuitute
l) Mizoram University hnuaia post-graduate online exam buaipuitu faculty member-te
Heng zawng zawng te hian anmahni nihna identity card an keng ngei ngei tur a ni.
9. Pawn (dawr/office/damdawiin/vantlang hmun) chhuak tur reng reng chuan (face mask emaw hmanraw dang hmangin) hmai an tuam ngei tur a ni.
HREMNA DAN:
He thupek zawm lo chu Disaster Management Act, 2005 Section 51 a Section 60, The Mizoram (Containment & Ordinance, 2020 Section 5 leh IPC Section 188 hmangin hrem theih an ni.
Sawrkarin heng thuchhuah a siam te hi a ṭul dan azirin a ennawnin a tidanglam thei ang
