Vawiin khan Pi Marli Vankung, Secretary, Law & Judicial Department chuan IASE Conference hall-ah ni 2 awh, rampum huapa Mipa leh Hmeichhia intluktlanna atan sawrkar hmalakna te zirhona hun, 'Two Day National Workshop on Gender Equity Initiatives for Institutional Head of various institutes and colleges',  The Institute of Advanced Studies in Education(IASE) in a buatsaih chu a hawng.

Marli Vankung, Secretary, Law & Judicial Department chuan mipa leh hmeichhia te kan intluk tlang sa reng a. Mahse, hei hi mi thenkhatin an hriatfiah loh avangin  sawrkar a inrawlh hial a ngai a, Mipa leh Hmeichhia te intluktlanna turin Hmeichhiate humhalhna dan thenkhat te siam a lo ni ta a ni a ti.Heng dan pawimawh tak tak te hi tha taka hmang tur chuan hriatchian hmasak a ngai a. Mizoramah phei chuan Gender Equity kaihhnawih thila sawrkar hmalakna leh dan pawimawh tak tak te hian hriat a hlawh lo tak zet a.  Hmeichhia te humhalhna dan te hi tunhnai tea siam te a nih bawk avangin a inzirtirna kawngah pawh tan lak a la ngai hle a ni a ti. "State thenkhatah chuan Hnathawhna leh Eizawnna hmunah te Hmeichhiate chunga hleilenna avanga complaint leh case te a awm nawk a. Mizoramah chuan Sexual Harassment of Woment at Workplace kaihhnawih thilah complaint a awm lova. Hei hi Mizoramah Hmeichhiate an him tihna a nih theih rualin a ni kher lo thei a; Hmeichhiate humhalhna Dan kan kan la hriatchian loh avanga case ni thei tur te enliam a ni thei bawk a ni", a ti a. Hmeichhiate hian Mipa te ang bawkin hlauhna leh huphurhna tellova pawnlamah leh hnathawhna hmuna an chhuah vah hi an chanvo dik tak a ni a. Hmeichhia an nihna anga enhniam, enhran leh dahhniam hi dan in a phallo a ni a ti.

Two Day National Workshop on Gender Equity Initiatives  inaugural programme hi Prof. Vanlalhruaii, Principal, IASE chuan a kaihruai a. He workhop-ah hian thupui  Pali  - Sexual harassment of women at Workplace - Prevention, Prohibition and Redressal (Act, 2013 and Rules, 2013), Internal Complaint Committee, University Grant Commission Regulation 2015 leh  Cyber Crimes against women  te zirho tura chhawp chuah a ni a. Principals leh  Head of Departments, Educational Institution zawng zawngte chu tel tura sawm an ni. Worshop ni khatnaah Dr H.S. Rana, Principal Director, Institute of Public Administration, Bangalore hnen atangin  Sexual harassment of women at Workplace - Prevention, Prohibition and Redressal (Act, 2013 and Rules, 2013) leh  Internal Complaint Committee chungchanga zirtirna neih a ni dawn a. Ni hnihnaah Dr Topi Basar, Associate Professor, National Law University and Judicial Academy, Guwahati chuan University Grant Commission Regulation 2015(Prevention, Prohibition & Redressal of Sexual Harassment of Women employees and students in Higher Education Institutions) Regulation 2015 leh Cyber Crimes against women chungchangah zirtirna a pe thung dawn a ni.