Vawiin chawhma dar 10 khan School Education Minister Pu Lalchhandama Ralte chuan Aizawl-a SCERT Auditorium-ah Headmaster leh zirtirtute training pekna tur National Initiative for School Heads' and Teachers' Holistic Advancement (NISHTHA) a hawng.

Hawnna thu a sawiah School Education Minister chuan ram pum huap Programme lian tak School- Headmaster leh zirtirtute training pekna tur kalpui a ni chu lawmawm a tih thu a sawi a. Training-a telte chuan training lote aia an danglamna an pho chhuah theih ngei a beisei thu a sawi. Kan ram leh hnam kal zel turah zirna hi a hnukpui ber a ni tih sawiin zirnaah kan hnam pum a than chhoh chuan kan sum lakluh pawh a tipung dawn a, lehkha thiam tamna ram apiang a nuam thin a ni a ti.

Pu Lalchhandama Ralte chuan school tinah inenkawlna tha kan kalpui a tul a, Headmaster-in a thawhpuite nen school community nuam a awm theih nan zirtirtu kan fuih thiam a, tih tur leh thawh tur kan pek thiam a tul a ni a ti. Discipline lamah pawh kan tih tur leh tih loh turah kan chian a ngai a, danin min phut angin kan kal em tih te, naupangte tan environment nuam lo a awm thei em tih te leh kan mawhphurhna theuhah zirlaiten an chan tur an chang em tih te thlithlai reng a ngai a ni a ti.

Minister chuan Digital India tih te pawh kalpui a ni a, rei vak lovah chuan smart class room te pawh kan la hmang ve ang, chungte pawh chu man pha tura kan inbuatsaih a ngai a ni a ti. Training-a telte chu thahnemngai taka training turin a fuih a ni.

Pi Lalduhawmi Thomte Deputy Director SCERT chuan NISHTHA training chungchang a sawifiah a. Pi Lalduhawmi chuan he programme hi MHRD hmalakna a ni a, NCERT, N.Delhi hnuaiah National Resource Group-ten state tinte tan training hi an kalpui a, India ram puma school head leh zirtirtu nuai 40 te training pekna tura duan a ni a ti a. Mizoramah chuan Directorate of School Education, SCERT leh Samagra Shiksha ten an buaipui a, Headmaster leh zirtirtu 8951 training pek tum a ni a, he training senso hi Samagra Shiksha-in a tum dawn tih a sawi bawk. Training hi District hrang hrangah vawi 60 buatsaih a ni dawn a, kumin chhung hian vawi 3 buatsaih hman tum a ni a, a bak chu kum tharah chhunzawm a ni dawn a ni.

Vawiina hawnna inkhawmah hian School Education a officer thenkhatte, MBSE Chairman te, SCERT officer te leh Samagra Shiksha SPD leh officer te an tel a, Primary leh Middle School Headmaster leh zirtirtu training tura koh te an tel a ni.