3827/2022-2023

Aizawl, 14th March, 2023: Urban Development & Poverty Alleviation Department hnuaia Scheme kalpui mek -Deendayal Antyodaya Yojana - National Urban Livelihoods Mission (DAY-NULM) hnuaia Aizawl City Mission Mangement Unit (CMMU) buatsaihin ni 3 chhung awh tur DAY-NULM Festival-cum-Street Food Festival chu vawiin chawhma khan UD&PA Director Pu H. Lianzela’n Aijal Club Park ah a hawng.

He programme hawnna hi chawhma dar 10:30 ah neih a ni a, khuallian Pu H. Lianzela, Mission Director (DAY-NULM) ni bawk chuan Festival-a tel DAY NULM beneficiaries te chu duhsakna hlanin an hnathawh leh thil tih reng rengah rinawmna leh taimakna lantir zel turin a fuih a. COVID hripui leng avangin beneficiary-te kutchhuak mipui hnena phochhuahna hun siam hleihtheih a ni lo reng a, tunah hun remchang kan nei thei ta hi a lawmawmin kan hlawkpui theuh ka beisei a ni a ti a. District hrang hrangah hetiang hi thla kalta lam khan hlawhtling takin buatsaih a ni tawh a, UD&PA hi hna thawh hi khawpui tihhmasawn a nih mai piah lamah khawpuia cheng retheite chawikan hi a tel a, sawrkar laipui pawhin a ngai pawimawh hle a ni a ti.

Pu H. Lianzela chuan Mizoram leh India ram mai bakah khawvel huapa mi hlawhtling kan tih tam tak hi an bul tanna chu tlawmte a ni a, retheihna leh harsatna tam tak paltlanga tumtuhna nena dingchhuak an ni a, anni ang bawk hian tumruhna leh taimakna nen kan hlawhtling ve vek thei a ni tih kan hriat a ngai a ti a. Self-Help Group kaltlanga hmeichhiate hmalakna a ropui a tih thu sawiin faina kawngah pawh tan la tel zel turin beneficiary te a chah a, Union Minister for Housing and Urban Affairs Pu Hardeep Singh Puri chuan March ni 7, 2023 khan ‘Women Icons Leading Swachhata’ (WINS) Awards 2023 ruahman a nih thu a puang tih sawiin, hmeichhia faina kawnga hma la thate chawimawina pek tur a nih thu sawiin hemi atan hian hmeichhiate theihtawp chhuaha tan la turin a fuih bawk. Khuallian hian Festival tlawh turin mi zawng zawng a sawm a, beneficiaries te thilsiam te an hlutsak a beisei thu a sawi bawk.

Hawnna inkhawm hi Pu Malsawmzuala, Project Director, DAY-NULM, UD&PA Department in kaihruaiin beneficiaries te chu kawng hrang hranga a fuih bakah hetiang hun hi buatsaih anih zel theih nan Department in hmalak a turn thu a sawi bawk. Festival hawnna inkhawm chu Pi Lalremruati, Deputy Director (A), UD&PA Department in lawmthu sawiin a khar a ni.

DAY-NULM Exhibition Cum Street Food Festival hian March ni 16 thleng a awh dawn a, nitin chawhma dar 10:30 atanga zan dar 8:00 (10:30 am - 8:00 pm) thleng mipuite tan dawr thei tura hawn thin a ni dawn a ni. He Festival ah hian DAY-NULM hnuaia beneficiaries hrang hrang ten an thil siam chhuah hrang hrang te hralh theih turin an phochhuak a. Exhibition stall 21 bakah Food Court 8 siam a ni a, hetah hian DAY-NULM hnuaia Street Food Vendors ten ei tur tuihnai tak tak an siam te an zuar a, naupang tan intihlimna buatsaih a ni bawk.