1881/2023-2024

Khawzawl, 14th September 2023 : Ni hnih awh tur District Level Childrens’ Science Congress 2023, Khawzawl chu vawiin chawhma dar 11:00 atang khan Govt. High School, Khawzawlah neih a ni a, he hun hi Khawzawl DEO, DPC, Samagra Shiksha ni bawk Pu Lalsikula chuan khuallian niin a hmanpui a ni.

Childrens’ Science Congress, 2023 hawnna Programme buatsaihah thu sawiin DEO Pu Lalsikula chuan, Childrens’ Science Congress-a tel zirlaite chu an thlen chin apiangah lawm zel turin an rilru leh ngaihtuahna te sang mar turin a fuih a. Tun tum Childrens’ Science Congress-ah hian 'Understanding Ecosystem for health and well-being' tih chu thupuiah hman anih thu sawiin tunlai khawvel ram changkang chho zel leh hmasawn chho zel hi mihringte khawsakna leh nunhona atana pawimawh taktak te a ni a, chutihrualin mihringte leh nungcha te, ramngaw leh thing leh maute hi inmamawh tawn vek kan ni a, hei hi Pathian min siam dan pawh a ni a ti a. Zirlai naupangte chu nakin zelah an hriatna leh theihna te chu an mihringpuite tan hmang thin turin a fuih bawk.

Pu Lalsikula chuan, Samagra Shiksha leh Mizoram Science Teachers Association ten kumtin Childrens’ Science Congress hi an buatsaih thin thu leh hei hi zirlaiten anmahni a theihna, thiamna leh finna leh creativity an neih te nakin zela khawtlang, ram leh hnam tana tangkai zawka an hman theihna tura inzirna an neihna tura buatsaih a ni tih a sawi a. Ram hmasawnna avangin zirlaite tana thil tangkai tak tak te, Project pawimawh tak tak te a awm chho zel a, zirlaite pawh an vanneihzia hre turin a chah a. Childrens’ Science Congress-a tel zirlai zawng zawng te chu intihsiakna an neih turah theihtawp chhuah tura fuihin duhsakna a hlan nghal a ni.

Khawzawl District-ah hian Childrens’ Science Congress hi kum 2019 atang khan kumtin hman thin a ni a, tun tum Childrens’ Science Congress-ah hian Junior Category leh Senior Category-ah te intihsiakna neih a ni dawn a, Junior Category-ah hian School 10 telin Project 11 thehlut a ni a, Senior Category-ah hian School 8 telin Project 9 thehluh a ni. Junior Category-ah hian Khawzawl atangin School 6 leh Khawzawl khaw pawn atangin School 4 an tel a, School 9 in Project 1 theuh neiin Presbyterian English School, Khawzawl Vengtharin Project 2 an nei thung a. Senior Category-ah hian Khawzawl atangin 4 leh Khawzawl khawpawn atangin 4 an tel a, School 7 in Project 1 theuh neiin Model High School, Khawzawl in Project 2 an nei bawk.

Childrens’ Science Congress hawnna Programme hi Dy. DPC Pu K. Thantluanga chuan kaihruaiin Pu C. Pazawna, Headmaster, Govt. Hermon M/S in hunserh a hmang a. Pu Jehova Jire-a, District Coordinator, CSC in Report a pe bawk a ni.