1882/2023-2024

Dated Aizawl, the 14th September, 2023: Vawiin khan Youth 20 Mizoram, Ram leh Hnam hmangaihna, Ram Chhanna leh Hmasawnna atana intawhkhawm (Meet on Nationalism, Patriotism & Developmen) kharna inkhawm Pachhunga University College Multipurpose Auditorium ah Sports & Youth Services Department bultuma buatsaih a ni a, he hun hi Pu Zoramthanga, Chief Minister chuan khuallian niin a hmanpui.

Thusawiin Chief Minister chuan, kan pi leh pute khan thlang rawn tla zelin he hmun Pathian ruatsak ram an thleng a. Kristianna a rawn luh hmain an zinga mi thenkhatin Tuipui ral atanga Mingo lo kal tur thute an lo puang lawk a, an sawi ang ngeiin Missionary te an lokal a, Kristian ram kan lo ni ta a ni. British awpna hnuaiah Political Party din theih a ni lova, India a indan dawn hnaih khan din phal a ni ta a, kan hruaitu hmasate khan khawi ram ber hi nge zawm tur ni ang tiin an buai hle a nih kha. Thutlukna mumal awm hmain British khan min kalsan a, India rorelna a rawn lut ta a ni. A hnu deuhvah Mautam tampui a lo thleng a, ngaihsak kan hlawh lo em em a, kan hruaitu hmasa Pu Laldenga ten Assam sawrkar an dawr a, mipuite zingah hnam thinlung a rawn par chhuak a, "India ram siamtute aiawh kalkhawmah kan tel ve lo va, barhluih dan mi pe a ni" tiin India sawrkar pawh an dawr zui ta a, kan hriat theuh angin rambuai a lo chhuak zui ta a ni. Mipui, kohhran leh tlawmngaipawl hrang hrangten inremna an beisei angin 1986 ah inremna kan nei a, ralthuam dahin Politics dawhkanah zawk ram leh hnam hmasawnna hnathawh leh Mizo Nationalism kalpui kan thlang ta a ni. A tir ata vawiin thlengin Mizo Nationalism hi kan kalpui reng a, tha kan thlah ngai lo. Tin, Nationalism hi hnam dangte va huat te, va ngai theih loh te lam a ni lova, Pathianin min pek ram leh hnam humhalha, dinchhuahpui hi a ni. He ram leh hnam humhim zel hi mitin mawh a nih rualin thalaiten mawhphurhna pawimawh em em kan nei tih hi i hrereng ang u. Zofate Nationalism bupui chu Mizoramah a awma, kan chhehvel rama kan unauteah a nung reng a, beisei takin min thlira, Aizawl hi an tan khawpui ralmuang leh him niin an ngai vek a ni, a ti. Tun hnaia harsatna hrang hrang Mizoramin a tawhte tarlangin Chief Minister chuan, heng harsatna te hian min chim buai mah se Pathian kaihhruainain ropui takin Mizoram hi a la dingchhuak dawn a, hun hnuhnunga a chanchintha hriltu atan he hnam hi min buatsaih mek a ni. Hnam thinlung nghet tak pu chungin kan ram tan hian i thawk zel ang u, tiin zirlai kalkhawmte a sawm a ni.

Khualzahawm Pu Robert Romawia Royte, Minister pawhin thusawiin G-20 chungchang leh chumi hnuaia Youth-20 Movement neih a nih dan te, Mizo thalaite mamawh tak thalaite ngaihtuahnaa nationalism leh patriotism tuh ngheta hmasawnna pawimawhzia inzirtir a tul thute a sawi a.Thla 2 chhung hmun hrang hranga Y-20 meets neihnaa mi tangkai tam takte chungah lawmthu a sawi a ni.

Youth 20 Mizoram kharna inkhawm hi Dr. Lalrozama, IAS, Secretary to the Government of Mizoram chuan a kaihruai a, ramin hma a sawn a, ram leh hnam hmangaihna thinlung te, inpumkhatna tha kan mamawhzia te thalaite thinlungah a thara kan tuh beiseiin he Youth 20 Mizoram programme hi kalpui a ni a. Aizawl district ah intawhkhawm vawi nga buatsaih niin District dangah vawi sawm buatsaih a ni a, a kharna inkhawm hi kan intawhkhawm vawi sawm leh parukna a ni, tiin Youth 20 Mizoram an kalpui dan tlangpui a sawi a, Chief Minister ruahmanna tha tak vanga he hmalakna hi a taka kalpui thei kan ni, a ti bawk.

A kharna inkhawmah hian Rev. Lalzuithanga'n hunserh hmangin Pu Lalnunmawia Pautu, President, MZP, Gen. Hqtrs chuan keynote address a sawi a, Pu Lalthlamuana Ralte, Adviser, MZP, vawiin inkhawm speaker chuan Youth 20 Mizoram thupui hmangin thusawina hun a hmang a ni.

India ramin G-20 Presidency a chelh kum denchhena hmalakna chi khat Youth 20 Mizoram Meet on Nationalism, Patriotism & Development hi July ni 14 atang khan neih tan a ni a, Mizoram pumah intawhkhawmna engemawzat buatsaih a nih hnuin vawiin hian a kharna hun an nei leh ta a ni.