1883/2023-2024

2023 Mimkut thla ni 14: Nimin, September ni 13, 2023 (Nilaini) khan India ram pumah Ayushman Bhava hawnna hun hman niin, Kolasib District tan chuan District Medical Superintendent Conference Hall-ah hawnna hun hi hman a ni.

Ayushman Bhava hi national level-ah India President Pi Droupadi Murmu chuan chhun dar 12:00-ah a hawng a. State level-ah Mizoram Governor Pu Hari Babu Kambhampati chuan chawhnu dar 12:40-ah a hawng ve leh a. Kolasib District-ah chuan chawhnu dar 2:30-ah Kolasib District Senior Chief Medical Officer Dr RK Lalthlamuana'n hawngin, hemi hnuaia Seva Pakhwada campaign kalpui tur a hawng nghal bawk.

Kolasib District tana Ayushman Bhava hawnna hun hi Deputy Chief Medical Officer Dr Zonunsiama'n kaihruaiin, District Hospital Kolasib-a Medical Officer Dr Lalrawngbawla'n technical report a pe a. Pradhan Mantri TB Mukt Bharat Abhiyaan lawmman sem nghal niin, TB veite tana chaw ṭha (nutritional support) pe ṭha zualte - El En Pharmacy (individual), Nazareth Nursing Home (Corporate), Village Council, Bilkhawthlir South, leh Village Council, Bilkhawthlir North te hnenah lawmman pek a ni a. Lawmman hi a dawngtute kutah Kolasib District Local Administration Officer Pu ST Lalhmingmawia'n a hlan a ni.

Ayushman Bhava hnuaiah hian heti ang hian hma lakna tur ruahman a ni:

1. Ayushman Aapke Dwar 3.0 – PMJAY Ayushman Card siam chhuah.

2. Ayushman Mela – Health and Wellness Centre-ah Health Mela, CHC/PHC hrang hrangah Medical Camp.

3. Ayushman Sabha – khaw hrang hrangah village/local level body-te'n Ayushman card pawimawhna te, ABHA ID siam te, NCD, natna hrik kai theih leh TB natna vei zawn chhuah pawimawhna, hriselna atana fimkhur leh mahni inuluk pawimawhna lam inzirtirna buatsaih.

Ayushman Bhava campaign hnuaiah hian September ni 17, 2023 aṭanga October ni 2, 2023 inkar chhungin hriselna beihpui thlak chawlhkar hnih awh, Seva Pakhwada kalpui a ni dawn a. Hemi chhung hian khua leh tui zawng zawngin hriselna atana mamawh an ban phak vek theihna turin hma lakna leh inzirtirna kalpui a ni dawn a. Swachhta Abhiyaan, organ donation leh blood donation lamah te pawh hma lakna kalpui tum a ni.