1884/2023-2024

Lawngtlai dated 14th September 2023: Vawiin chawhma khan CYLA Hall, Lawngtlai-III ah Family Oriented SEDP Phase - II tlangzarhna hun hman niin Pu H.Biakzaua, Deputy Speaker chu khuallian a ni a. Pu V.Zirsanga, CEM, LADC chuan khual zahawm niin Pu H.Lalhmingthanga, Deputy Commissioner chuan kalkhawmte lawmna thu a sawi bawk a ni.

Khuallian Pu H.Biakzaua, Deputy Speaker chuan chhungkaw khawsak chawikan nana eizawnna ngelnghet nei tur a bultanna tur leh eizawnna nei sa ten a an eizawnna tih changtlun nana Family Oriented SEDP kaltlang a tanpuina an pek thin chu Lawngtlai District chhung a chhungkaw thahnem takin an tangkai pui thu a sawi a. Phase-I hlawhtling tak a kalpui a nih hnu ah September ni 15 ral hma in chhungkaw 4515-in Phase-II hnuai a tanpuina an dawng leh tur chu lawmawm a tih thu a sawi. Deputy Speaker chuan Phase-III kalpui turin inbuatsaihna a kal mek thu tarlangin hamthatna dawng tur thlan chhuah kawngah hmasawnna inkhairual a awm theih nan chhungkaw ngai thlan nawn aiin la dawng ve lo te ken thiam a pawimawh thu a sawi bawk a ni.

Pu H.Biakzaua chuan Family Oriented SEDP chu chhungkua leh khawtlang tih hmasawnna hmanraw tangkai a nih angin a nihna tur tak a hmang turin hamthatna dawngtute a chah a, ei leh bar intodelhna kawng a hmasawnna thlentu a hmang turin a fuih bawk a ni. Sawrkar tha tichak turin SEDP chu kawng hrang hrang ah hman anih bawk thu Deputy Speaker chuan sawiin SEDP kaltlangin zirtirtu indaih lohna ah zirtirtu dah belh te, mipui hriselna enkawl tur a thawktu lak belh te leh thil dang dangah tangkai tak a hman a nih thu a sawi.

Hripui leng avangin khawvel pum ah harsatna nasa tak tawkin hun engemaw chen kan hman hnu ah Mizoram Sawrkarin a Flagship program Family Oriented SEDP tihlawhtling tur a hma a lakna hi mipuiin kan hlut thiam a tul thu Pu H.Biakzaua chuan sawiin heng harsatna hrang hrang kar a SEDP hlawhtlinpuitu ni turin leh midangte tan a entawntlak ni turin hmathatna dawngtute chu a chah bawk a ni.

Khual zahawm Pu V. Zirsanga, Chief Executive Member, LADC chuan sawrkar atanga tanpuina kan dawn te chu a nihna tur tak a hmang turin leh hlut thiam turin kalkhawmte a chah a. Sawrkarin Family Oriented SEDP sem chhuah kawnga a mawhphurna chu a hlenchhuak mek a, a taka a hlawhtlin leh hlawhtlin loh chu a dawngtute mawhphurna a nih thu sawiin hlawhtlinpuitu nih tum theuh turin kalkhawmte a chah bawk a ni.

Pi Marilyn Rualzakhumthangi, Project Director, DRDO chuan Lawngtlai district a Family Oriented SEDP Phase-I leh Phase-II kalpui dan tlangpui tarlanna hun a hmang a, Phase-I a titha zual thlan chhuah mi 8-te hnen ah lawmpuina thuziak hlan niin Pi Margaret J.Vanlalremmawii, SDO(S) in lawmthu sawina hun a hmang bawk a ni.

Family Oriented SEDP Phase-II ah hian Line Department 8 hnuai ah hamthatna dawng tur mi 4515 thlan chhuah an ni a, Veterinary & Animal Husbandry hnuai a hmalak tum tam berin mi 3163 an awm a ni.