Vawiin  chawhma  khan  ni hnih  (5th - 6th August, 2010)  chhung awh tur 'Workshop on NLUP' for Lawngtlai District chu YLA Hall, Lawngtlai-III ah tan a ni a, Pu Lal Thanzara, Parliamentary Secretary chu khuallian niin Pu H. Zothangliana, Parliamentary Secretary chu khual zahawm a ni a, Pu Lalthlamuana, DC Lawngtlai in inkhawm a kaihhruai a ni.
Khuallian chuan NLUP hi Mizoram tana Pathian thilpek a nih thu sawiin, Sawrkar pawhin sem mai pawh a duh a, amaherawhchu Prime Minister Dr. Manmohan Singh-a'n a phurpui em em a, hetiang taka policy tha leh changtlung hi chu State dangte mai bakah National Policy atan hial pawha hman tlak ni a a ngaih avangin uluk leh zuala ngaihtuah a duh a, hei vang hian duh ang pawhin a hmanhmawh theih ta lo a ni a ti a. NLUP hi a hlawhtlin tak tak theihna tur chuan thuawihna, rinawmna leh taimakna a ngaih thu sawiin, Zokhua mirethei mahni hawpkhawp nei tawh loten an lo dinchhuah leh thei nan NLUP hi kalpui anih avangin theihtawp chhuaha sawrkar hmalaknate thlawp a tul zia a sawi bawk.

Pu PL Thanga,IAS (Rtd) Vice-Chairman, NLUP Implementing Board-in NLUP chungchangah zirtirna pe in powerpoint presentation a nei bawk a ni.

He workshop hi Lt. Col. ZS Zuala, MLA leh Sawrkar officer pawimawh tak tak ten an hmanpui a, Lawngtlai District a V/C te leh tlawmngai pawl hrang hrang te, Sawrkara Line Department hrang hrang aiawhte an tel tha hle a ni.

Workshop hi naktuk (6th August, 2010) chhunzawm leh a ni ang a, hetah hian line department hrang hrang ten NLUP chungchangah zirtirna pein technical presentation an nei ang.

NLUP Workshop hi Champhai, Mamit leh Saiha-ah te neih tawh a ni a, ruahmanna ang ang chuan Serchhip, Kolasib leh Chawngte-ah te neih chhunzawm leh tum a ni.