Vawiin zing dar 10.30 atang khan Aizawl leh Lunglei khawpui chhunga tunlai thiamna hmanga septic-tank enkawl leh paihfai dan (Septage Management) tur chungchangah inrawnkhawmna chu Aijal Club-ah neih a ni a. He inrawnkhawmnaah hian Aizawl Municipal Council (AMC) councillor te, local council aiawh te, UD&PA Department aiawh te, City Sanitation Task Force, Aizawl leh Lunglei aiawh te, SIPMIU hotu te, Asian Development Bank aiawhte leh he hna enkawlpui tura ADB-in an rawih IPE Global Private Limited atanga mithiam lokalte an tel a.

UD&PA Minister Pu Zodintluanga chu khuallian a ni a; Pu CT Zakhuma, AMC Chairman chu khual-zahawm a ni UD&PA Minister Pu Zodintluanga chuan, “India sawrkar chuan National Urban Sanitation Policy hi a ngai pawimawh hle a; khawpuia chengte zawng zawngin zunram thiarna tha, thianghlim leh tlo kan neih vek theihna turin ruahmanna a siam a. Chutiang hmathlir tihhlawhtlinna hmasa atana hmar-chhak state khawpui 3 zinga Aizawl leh Lunglei khawpui min rawn thur chhuak hi kan vannei hle a ni” a ti. Minister chuan septic-tank enkawl that leh a paihfai hnate chu mipui hriselna nghawng thei thil a nih avanga fimkhur taka tunlai thiamna hmanga kalpui a tul thu sawiin, “Tuihawk luankawr leh kan ni tin bawlhhlawh paihna lam kan ngaih vei tlukin septic-tank enkawl leh paihfai chungchang hi kan vei tawk lova. Tunah chuan ADB sum hmangin septic-tank a bawlhhlawhte chu awmze nei takin a sawisakna hmun turah kan luankhawm tir ang a, thlai chawmna atan a tui leh ekchhia thlitfimte chu kan hmang thei tawh dawn a ni” a ti. Khawpui thianghlim, hrisel leh chenna tlak neih chu khua-leh-tuite chanvo a nih ang bawkin, sawrkar ruahmanna tihlawhtling tura theih tawpa puihbawm chu mipuiten mahni hmakhua a nih hriaa thlawp turin Minister chuan a chah bawk a ni.

Khual-zahawm Pu C.T. Zakhuma chuan September 2011 atanga Aizawl khawpui chhunga bawlhhlawh paih hna AMC-in an enkawl tak thu sawiin, “Aizawl khawpui chhungah Local Council 82 an awm a, anni nena tangrualin Public Private Partnership hmangin khawpui bawlhhlawhte kan paih a, kan khawpui pawh hmuh theihin a fai a ni. Chuvang chuan tuna Septage management pawh hi mipuite leh mawhphurhtu zawng zawngte nena kan tanrual chuan hlawhtling takin kan kengkawh thei ang tih ka ring a ni” a ti.

UD&PA Principal Secretary Pu R.L. Rinawma pawhin thu sawiin khawpui enkawl thianghlimna tura sawrkar ruahmanna tihlawhtling tura mipuite tawiawmna leh thil awmzia inzirtir that a tul thu a sawi a. Hmar-chhak state zinga SIPMIU hnathawk tha ber kan nih avanga Central sawrkar leh ADB duhsakna kan dawn chu kan zavaia hamthatna tura kan hman thiam a pawimawh thu a sawi bawk. Pu Valbuanga, SIPMIU Project Director pawhin ADB sum hmanga Project-I hnuaia an hnathawh tawhte leh Project II hnuaia hmachhawpte a sawifiah bawk a ni.

Septage Management chungchanga inrawnkhawmnaah hian thupui zirho bik tur ruahmanin, mawhphurhna nei turte chu group 4-ah an insemsawm a. Heng group-te hian mithiamte kaihhruaina hnuaiah – Thianghlimna vawng tura vantlang mawhphurhna te, harsatna te leh a chinfel dan tur tih te; Thiamna changkang zawk hmanga bawlhhlawh sawngbawl dan tih te; Bawlhhlawh senghawi kawnga tualchhung mite hman tangkai dan tur tih leh Khuarei daih tura bawlhhlawh sawngbawlna ruahman dan tur tithe an zirho a ni.