Mizoram Social Defence & Rehabilitation Board, Social Welfare & Tribal Affairs, Social Welfare Department buatsaih ni li (4) awh training “4 Days Training of Trainers (TOT) on Life Skills in the field of Drug Abuse Prevention” chu 24th February, 2020 khan neih tan niin vawiin ni 27, February, 2020 hian ICPS, Training Hall ah kharna hun neih a ni a. Pi A. Vanlalzawni, Joint Director, Social Welfare & Tribal Affairs, Social Welfare Department chuan Training kharna hun hmanpuiin, thu a sawi a ni. Social Welfare & Tribal Affairs Joint Director chuan training a tel te hnenah Certificate hlanna te neiin an thil zir leh thiamna te midang hnena hmang chhuak leh theuh turin duhsakna a hlan bawk a ni.

He training in a tum ber chu Tleirawl/Rawlthar (Adolescent) ten ruihhlo laka an inven theihna tura pawimawh em em leh an nitin nun atana pawimawh em em leh tangkai bawk si “Life Skills” zirtir pek a ni a. Ruihhlo dona kawnga kan hmalakna hrang hrang te a kal mek lai hian, kan ram dinhmun erawh a lungawi thlak loh hle a, Ministry of Social Justice & Empowerment leh AIIMS New Delhi te tangkawpin Nikum 2019 a Nation Survey “ Magnitude of Substance Use in India” a tihchhuah atanga alan danin Opioids Drugs (Heroin, No.4) hmang nasa ber state kan ni tih a tarlang nghe nghe a ni. Drugs Abuse prevention (Ruihhlo hmansual laka invenna) lama hma nasa taka kan lak loh chuan Ruihhlo Do hian hma a sawn mawh hle dawn niin a lang. Kan ram thalai Ruihhlo in ala tihbuai ve loh tam zawk te venhim leh anmahni a inrintawkna leh an nun tichhe vek thei thil Ruihhlo hi an hnawl ngam theihna tura thiamna Life Skills zirtir hi he training in a tum ber chu a ni.

Training ah hian ruihhlo leh a kaihhnawih chungchanga thiamna hrang hrang lo nei tawh Sawrkar Department, College zirtirtu leh NGO aiawh te an tel a, anni hian school, college leh hmun hrang hrangah te Life Skills chungchangah zirtirna an pechhawng ve leh dawn a ni. He Training ah hian Resource person chu Pi Madhavi Vincent Osta, New Delhi a ni a, ani hi Ministry of Human Resource Development, UNODC, UNICEF ah te Resource person atan hman mek a ni. Adolescence Education Programme Module hman mek ziaktu te zinga mi niin, tuna New Delhi Sorkar School tina hman mek Yuva Module Joyful learning leh Life Skills awmna te ziaktu zinga mi ani a, Yuva Club pawh sawrkar school tinah din ani. Heng bakah hian NCERT leh NIOS zirlaibu chhungah pawh hian a thu ziak Life skills chungchang a tel bawk a ni. He training hi National Institute of Social Defence, Ministry of Social Justice & Empowerment in a Sponsored a ni.