Vawiin khan Mizoram Upa Pawl South-II Area chuan Tuikhuahtlang YMA Hall, Aizawlah Conference an hmang a. Social Welfare Minister Dr.K.Beichhua chu khuallian a ni.

Mihringte chunga malsawmna ropui ber chu damreina a ni tiin Dr K.Beichhua chuan MUP South –II Area huamchhungah kum upa mi engemawzat an awm chu lawmawm a tih thu leh Pathian malsawmna ropui tak nia a hriat thu a sawi a.’Upa’ nih chu a zahawm a, ‘tar’ rilru erawh pu lo turin a fuih. Social Welfare Minister chuan sawrkarin kum upate a ngaihlu a, sawrkar laipui scheme Upa Pension an lak thin pawh Mizoramin a do letna a pek thin cheng sawmnga chu a leta tih pun a nih thu a sawi a. Social Welfare Department chuan baseline survey nei tanin Upa Pension hi a dawng tur dik takin an dawn vek theih nan tan an la mek tih a sawi. Dr K.Beichhua chuan kum upate chu an tawn hriat atanga an thil zirchhuahte naupang zawk hnenah hlanchhawng thin turin a chah a, kum upate chu Pathianin Mizoram tana malsawmna a pek an ni, a ti.

He huna thusawitu dang Dr Ankita Chakravarty, IAS, Social Welfare and Tribal Affairs Director chuan an Department hmalakna hrang hrang sawiin sawrkar laipui atanga scheme lo kalte tha taka kalpui tum a nih thu leh National Action Plan for Senior Citizens hnuaiah Mizoramin Action Plan a buatsaih pawh pawm a nih thu a sawi. Upate hamthatna atan Department chuan theihtawp chhuahin hna a thawk mek a ti a, thurawn leh rawtna an nei a nih chuan an tan a inhawng reng tih Director chuan a sawi bawk.

MUP Aizawl South-II Area conference ah hian palai kal zinga upa ber mipa leh hmeichhia hnenah chawimawina an hlan a. Pu Laihnuna kum 96 leh Pi C Lalchungnungi kum 90 ten chawimawina hi an dawng a ni.

Programme hi Senior Adviser Pu Lalthlengliana’n a kaihruai a. MUP General Headquarters President Pu Lalhuapzaua leh MUP South-II Area aiawhin Pu C.Chhuanvawra ten thu an sawi a ni.