Champhai District Chapchar Kut Celebration Committee chuan vawiin khan DC Conference Hall-ah Chapchar Kut lawmna tura inpuahchahnate Working Committee Chairman Pu Mark Lalthanliana hovin an thlirho.

He hunah hian Chapchar Kut ni a hun hman dan tur hrang hrang leh senso ngaite Chapchar Kut Working Committee aiawha Sercretary Pu PC Lalrawnliana chhawpchhuahte chu siamthat ngaite siam that anih hnuah lungrual taka pawm a ni a. Dr Lallawmkima, Member Secretary, Fundraising Committee hnen atangin senso tuak dan tur leh hmalak dan turte ngaihthlak a ni a. Chapchar Kut ropui leh hlawhtling tak, mitin huapzoa hun hlimawm tak hman anih theihna turin department hrang hrangte chanvo leh hmalaknate sawiho a ni a, a darhzau thei ang bera kut hmang tura sawmna siam nise tih anih bakah he ni hian a khat tawka kangmei ven kawnga inzirtirna bakah HIMNA-MADAT kaltlangin ruihhlo leh a kaihhnawih laka fimkhur tura inzirtirnate mipui hnena puanchhuah nise tih a ni bawk.

Ruahman dan chuan Champhaiah ropui leh hlimawm taka Chapchar Kut lawm tum a ni a, March Ni 6, 2020 (Zirtawpni) hian District Sports Complex, New Champhaiah lawm tur niin, Champhai North bialtu MLA leh Vice-Chairman, Health & Family Welfare Board Dr. ZR Thiamsanga chu Kut Pa a ni dawn a, Sub Hqtrs YMA President Pu VL Chama Hnamte chu Kut thlengtu niin, Champhai Bawrhsap Pu SL Naveen chu Kut uaptu tur a ni ang. Chapchar Kut hlimawm leh mitin huapzo, Mizo hnam ziarang pholang thei tur huaihawt tum a ni a, mipui tana awlsam zawk nan ei leh in zawrhna bakah man tlawm zawka hnam thuam zawrhna dawr hawn a ni dawn bawk a. Hnam lam leh zai bakah ennawm hrang hrang hmuh tur a awm dawn a ni. Chapchar Kut pual hian Sawrkar Pisa hrang hrang zinga Mizo hnam thuama inthuam nalh lawmman siam a ni dawn a, heng bakah hian Chapchar Kut hmang tute zinga Naupang kum 6 hnuai lam Hmeichhia leh Mipa Mizo hnam thuama inchei mawite leh Nula fel leh mawi thlan chhuah tur a ni bawk.

Champhai District Chapchar Kut Celebration Committee chuan Champhai District mipuite chu Chapchar Kut lawmna huna tel vek tura sawmin hun hlimawm leh hlawkthlak tak hmang theuh turin duhsakna a hlan a ni.

Attachment

  • Loading attachment...