Vawiin khan I&PR Conference Hall, Mamit-ah Zoological Survey of India, Kolkatta leh National Mission on Himalayan Studies (NMHS) bakah Mizoram Forest Department buatsaihin nihnih awh "Impact of Forest Fire on Faunal Resources of North- Eastern States" tih thupui hmangin Training neih a ni a. He hun hi Pu K. Lalmuankima, Honorary Wildlife Warden, Mamit District chuan khuallian niin a hmanpui.

Khuallian chuan ram kang avanga nungchate'n tawrhna an hmachhawn dan chungchang zirho tura kalkhawmte chungah lawmthu a sawi a. Climate Change chu thil thleng tak tak a ni a. Climate Change avanga khawvel hmun hrang hranga chhiatna thlengin nungchate tawrhna leh harsatna a thlen nasatzia sawiin tuna mihring damlai mekte'n ramngaw leh nungchate tana theihtawp kan chhuah lo anih chuan khawvelah chhuan tam tak a awm theih dawn loh thu a sawi.

Khuallian chuan Meisi tetakte-in kangmei rapthlak tak a chhuah thei angin keini'n thil tetakte leh ho tham tak emaw kan tih chu thil ropui tak a ni thei a. Khawvel chhe mek siamtha tura tha thawhtu nih tum theuh turin kalkhawmte a sawm nghal bawk.

He hun hi Pu Shashank Jaiswal, IPS, SP Mamit chuan Guest of Honour ni-a hmanpuiin kalkhawmte fuihna thu tha tak tak a chah a. Special Guest Pi Gracy L. Bawitlung, CJM Mamit leh Pu Lalnunzira, DFO Kawrthah pawhin thu an sawi bawk.

Vawiin Training-ah hian Zoological Survey of India, Kolkatta atanga mithiam lokalte'n thupui hrang hrang hmanga zirtirna pein Dr. Bheem Dutt Joshi chuan Overview of Impact of forest fire in North- Eastern Himalayas tih thupui hmangin kalkhawmte zirtirna a pe a. Wildlife Forensics, samples collection, preservation and processing tih thupui hmangin Dr. Ashutosh Singh chuan zirtirna pein Mr. Arghya Chakrabarty chuan Ongoing field study suggesting forest fire activity trend in Mizoram tih thupui hmangin zirtirna a pe a. Kalkhawmte atanga zawhna leh chhanna hun hman nghal a ni bawk.

He hun hi Dr. Bheem Dutt Joshi, ZSI Kolkatta leh Pu Lalnunsanga Khawlhring, DFO Mamit chuan kaihhruaiin Mamit khawpui chhunga Department hrang hrang aiawh bakah zirlai naupangte an tel a. Training hi naktuk hian chhunzawm leh a ni ang.