Lo leh Huan thlai,Pangpar leh Thei kung lama eizawnna a leta a lo hlawk theih nana “Doubling Farmers’ Income’ tih thupui hmanga Horticulture,Govt. Of Mizoram buatsaih Horti Fair -2018 leh Seminar chu vawiin khan Home Minister Pu R Lalzirliana chuan Mizoram Assembly Annexe Building,Basement 1 & 11 ah a hawng. Horticulture Conference Hall ah mithiamte zirtirna leh Power Point Presentation hmanga hrilhfiahna vawiin chawhnu atanga tunkar Zirtawpni thlengin Seminar neih ani bawk ang.
Lo leh huan thlai a tak ngeia tuichilh leh tawnhriat ngahte bulah a awm theih avang leh hetiang hlawhtlinna phochhuahna runpui Horti Fair -2018 ah a tel theih avanga lawmthu sawiin khuallian Pu R Lalzirliana chuan naupan lai leh tunthleng pawha a thawh thin leh a tui na a nih thu leh Nun tihlimtu an niin huanthlai bula tawngtai te hi a pawimawh a,thinlung taka hmangaih chunga enkawl an nih chuan an lo hrisel in an duah bik thin thu a sawi.
Horticulture hnathawh hi Eden Huan atanga lo intan tawh a niin Bible nen pawh a inrem thlap a.Zofate pawh hi helamah hian kan harh thar tawh hle a, tunah phei chuan hmun awl a tlem tawh thu Minister chuan sawiin zirtur leh hmasawnna tur erawh a la tam a, khawi maw laia tui tai put mai mai thinte khawl dan tur te ngaihtuahna ah awm thu leh tui hi a tangkai em avangin khawl that theih anih chuan kawng tam takah intodelh theihna kawng a awm dawn thu leh chu lam chu mithiamte’n hmangchang hre taka an la duan chhuah a beisei thu a sawi.
Horticulture Department in hma asawn dan leh Horti Fair atanga dawrte leh sum lakluh lo pun chhoh zel dan sawiin Pu R Lalzirliana chuan Mipuiin Horti Fair hi an ngaihhlut chhoh zel avangin Stall pawh a pung chho zel a,nikumah stall 140 awm in Rs. 45,97,415 lakluh a ni a, kumin ah Stall 187 awm in sum pawh tam zawk lakluh leh beisei ani a, tunah phei chuan a hmun hma pawh zauhvin Soil Conservation Department ,Garage pawh stall atana hman a lo ngaih hial tak thu a sawi a.Mizoram Bazar ah Horti kutchhuak hmuh tur a tam hle a,Anthurium leh pangpar leh thlai dangah te pawh bazar luahlumtu ber te zinga mi an ni ta a ti bawk.
Pi Lalhrangliani,Addl.Secretary ,Horticulture Department kaihhruai Horti Fair – 2018 hawn programme ah hian Best Farmer -2018 & Best Enrepreur Award - 2018 chu Horti Fair denchhen hian siam a ni a, Division tin atangin mi pakhat theuh an thlan chhuah mi hlawhtling te hnenah Minister chuan Lawmman tangkafai leh Citation a hlan nghal a ni.
Horti Fair- 2018 tluang taka buatsaih a nih theih nana hma latu leh sulsutu leh kalkhawm te hnenah lawmthu sawiin Pi.Dr.Elizabeth Saipari, Director of Horticulture chuan Horti Fair neih chhung 5th – 8th June,2018 hian an stall te tlawha leisak turin mitin a sawm nghal a ni.
Horti Fair ah hian thei leh thlai tiak quality hrang hrang te zawrh a niin huan lam tui mite tanpui tur materials te bakah house plant leh pangpar chi hrang hrang lei tur a awm bawk ani.
