3443/2023-2024

Aizawl, 23.01.2024 : Labour, Employment, Skill Development & Entrepreneurship Department buatsaih ni thum awh ‘KAWTCHHUAH – 2024’ (2nd Mizoram Startup Competition for Govt. ITI pass-outs) chu vawiin khan Govt. Aizawl ITI Auditorium-ah hawn a ni.

He intihsiakna hawnn inkhawmah hian Pu Lalramsanga Sailo, Secretary, LESDE Department chu khuallian niin, LESDE Department in KAWTCHHUAH 2024 kaltlanga mahni kutkawih leh them thiamna hmanga eizawnna bultanna chawilar chu a tum ber a nih thu a sawi a. ITI atanga zir chhuak tawhte, an kal zelna tur kawng sah kuakpui a, tiphurtu leh chona thar petu atan he programme hi duan a ni a ti. ‘KAWTCHHUAH’ tih hi Mizo pi leh pute hnathawk tur leh an thiam thilte hmang tangkai tura an innghah khawmna hmun a ni a, hemi hmun atang hian an hnathawhna tur theuh an pan thin angin, he KAWTCHHUAH programme hi ITI atanga zirchhuak ten hmang tangkai turin intihsiak tura kalkhawmte a chah bawk a ni. He intihsiakna hi Ministry of Skill Development & Entrepreneurship (MSDE) hnuaia Skill Strengthening For Industrial Value Enhancement(STRIVE) project hnuai atanga buatsaih niin, STRIVE hian ITI tihchangtlun hi a tum ber a nih anga hmang tangkai thiam turin kalkhawmte a chah a. Sawrkarin Startup programme a ngai pawimawh a, hemi atan hian Mizoram Startup Mission pawh dinin he hmalakna tih hlawhtlin hi LESDE Department mawhphurhna a ni a ti bawk.

Hun kaihruaitu Pi Angela Zothanpuii, Director, LESDE Department chuan Intihsiakna tel turte inhmel hriattirna neiin, Intihsiakna ni 3 chhungin theihtawp chhuah a, lawmman hmu ngei tura tan la turin a fuih a. LESDE Department chuan ITI zirchhuakte hmakhua ngaihtuah sakk zel a tum thu leh, tun aia nasa leh zuala ITI zirchhuak te Entrepreneur tha an nih theih nana hmalak chhunzawm a nih zel tur thu a sawi bawk a ni.

KAWTCHHUAH-2024 hi Govt. ITI pass chhuak tawhte tana hmalakna bul tanna tura business plan nei tha thlanchhuah tur niin, he intihsiakna a tel tur hian application 44 a lut khawm a. Heta tang hian mi 30 ten Intihsiakna hmachhawn tura inbuatsaihin, Skill Competency test leh an ruahmanna (Business Plan) sawifiahna a endiktute endikna atanga ti tha thlanchhuahte hian pawisa fai Rs. 1,00,000/- (nuai khat) theuh an dawng ang a, a pumpuiah lawmman atan hian Rs. 15,00,000/- (nuai sawm panga) dah a ni.

KAWTCHHUAH-2024 hi vawiin ni 23.01.2024 atang tan niin, naktip ni 25.01.2024 hian LESDE Department changtu Minister, Pu Lalnghinglova Hmar in kharna hun a hmanpui dawn a ni.